«Սերժ Սարգսյանն առաջիկայում` մինչև փետրվարի 27-ը պետք է ԱԺ ընտրությունների օրը նշանակելու մասին հրամանագիր ստորագրի: Աժ ընտրությունները կարող են անցկացվել ապրիլի 28-ից մայիսի 8-ն ընկած ժամանակահատվածում»,- գրում է «ՀԺ»-ն և հավելում.
«Նշված տասնօրյա ժամանակահատվածում կիրակիները երկուսն են` ապրիլի 29-ը և մայիսի 6-ը: Նշենք նաև, որ նախորդ՝ 2007 թվականի խորհրդարանական ընտրությունները տեղի են ունեցել շաբաթ օրը, մայիսի 12-ին:
Ամեն դեպքում խորհրդարանական ընտրությունները կարող են տեղի ունենալ շաբաթ կամ կիրակի օրը, որովհետև, ի տարբերություն նախագահական ընտրությունների, Աժ ընտրությունների քվեարկության օրը օրենքով սահմանված չէ ոչ աշխատանքային օր: Գրեթե հստակ է, որ ՀՀ իշխանությունները մտադրվել են Աժ ընտրությունները մայիսի 6-ին անցկացնել:
Այդ դեպքում համամասնական և մեծամասնական ընտրակարգերով պատգամավորության թեկնածուների առաջադրումները պետք է սկսվեն մարտի 12֊ին և տևեն տասը օր: Նաև սրանով է պայմանավորված, թերևս, որ ՀՀԿ համագումարի օրը, որ ի սկզբանե հայտարարված էր մարտի 17-ին, տեղափոխվեց մարտի 10: Այլապես կստացվեր, որ ՀՀԿ-ականները պատգամավորի թեկնածու առաջադրվելու իմաստով կարող էին ցայտնոտի մեջ ընկնել»:
