Վ. Օսկանյանն արժանի է, որ ԲՀԿ-ին անդամակցելու դիմումը բավարարվի: «Առաջին լրատվական»-ի հետ զրույցում նման տեսակետ հայտնեց Քաղաքագետների միության նախագահ Հմայակ Հովհաննիսյանը` գնահատելով Վ. Օսկանյանի հնարավոր անդամակցությունը ԲՀԿ-ին: Նա նշեց, որ այս հարցվում որևէ խնդիր չի տեսնում:
«Կարող եմ ասել միայն այն, որ Վարդան Օսկանյանը քաղաքական հասարակական գործիչ է, ով բիզնեսներ չունի, և կարծում եմ, որ միանգամայն արժանի է, որպեսզի իր դիմումը բավարարվի ԲՀԿ կողմից, եթե պետք է, նաև տեղ զբաղեցնի նախընտրական ցուցակում: Դա կլինի տրամաբանական: Ինձ չի զարմացնում»,- նշեց քաղաքագետը`հավելելով, որ Վարդան Օսկանյանը այն նախարարներից մեկն է եղել, ով աշխատել է Ռ. Քոչարյանի հետ իր նախագահության ժամանակ:
Ըստ Հ. Հովհաննիսյանի` որևէ կապ նրա որոշման և Ռ. Քոչարյանի հնարավոր մասնակցության միջև չկա: «Ես կարծում եմ, որ անհավանական է Ռ. Քոչարյանի մասնակցությունը: Կրկնում եմ` Քոչարյանը եղել է ԼՂՀ նախագահ, այնուհետև 10 տարի ՀՀ նախագահ, չեմ կարծում, որ նա նման քայլի գնա: Ասել` եթե Օսկանյանը մասնակցում է ընտրություններին, կնշանակի, որ Ռ. Քոչարյանի մասնակցությունը հավանական է՝ ես չեմ համարում»,- մեկնաբանեց Հմայակ Հովհաննիսյանը:
Նշենք, որ այսօր լրատվամիջոցներով հաղորդագրություն է տարածվել, որ ՀՀ ԱԳ նախկին նախարար Վարդան Օսկանյանը դիմում է ներկայացրել «Բարգավաճ Հայաստան» կուսակցությանն անդամակցելու նպատակով:
