Եվրոպացիները փորձում են թուրքերին դուրս մղել Եվրոպայից: Այսօր լրագրողների հետ հանդիպման ժամանակ նման տեսակետ հայտնեց քաղաքական գիտությունների դոկտոր, պրոֆեսոր Լևոն Շիրինյանը`խոսելով արտաքին քաղաքականության մարտահրավերի շուրջ:
Մասնավորապես անդրադառնալով Ֆրանսիայի Սենատում ընդունված բանաձևի շուրջ ծավալված գործընթացներին` Լ. Շիրինյանն ասաց, որ Ֆրանսիան այս բանաձևի ընդունմամբ փորձում է զսպել թուրքերին՝ հետագայում Եվրոպայից դուրս մղելու նպատակով: Ըստ բանախոսի, Ռուսաստանը Թուրքիայի հետ մերձեցման քայլեր կանի, որտեղ Հայաստանը պետք է հստակեցնի իր դիրքը: Լ. Շիրինյանի խոսքով`պետք է երկու սցենար հաշվի առնել`Հայաստանի հաշվին Ռուսաստանը և Թուրքիան կսկսեն միավորվել կամ դա տեղի չի ունենա:
«Մենք պետք է բազմավեկտոր քաղաքականությունն ակտիվացնենք: Սրանք հարցեր են, որոնք մեր առջև են ծառանալու, որոնց պատասխանները պարտավոր ենք ունենալ»,- նշեց քաղաքագետը`հավելելով, որ հայ ժողովրդի շրջանում տրամադրվածություն կա ռուս-թուրքական թշնամության վերաբերյալ: Սակայն, ըստ նրա, Թուրքիան երկու անգամ պատմության ասպարեզից չքանալու առջև է կանգնած եղել և երկու անգամ փրկվել է ռուսական զենքի օգնությամբ: Նրա համոզմամբ` պատմական փաստից պետք ենթադրենք և քննարկենք՝ կկրկնվե՞ն այդ խաղերը, թե՞ ոչ:
Լևոն Շիրինյանը նկատեց, որ Փարիզում Ցեղասպանության հերքումը քրեականացնող օրինագծի ընդունման գործընթաց էր գնում, իսկ Թուրքիայի արտգործնախարարը Ռուսաստանում էր: Լևոն Շիրինյանի կարծիքով` սա մեսիջ է, որը մտածելու տեղիք պետք է տա:
Բանախոսը չի բացառում, որ Թուրքիան քայլեր կձեռնարկի ոչ ի նպաստ Հայաստանի: Լևոն Շիրինյանը կարծում է, որ Հայաստանը պետք է օգտվի հնարավորությունից և Ֆրանսիայում ընդունված օրինագծի գործընթացը սկսի Ռուսաստանում: Ըստ նրա` հնարավորությունը պետք է բաց չթողնել: «Ես կարծում եմ, որ վիճակը նպաստավոր է, և ՌԴ-ն մեր կարիքն ունի: Շատ հարմար պահ է: Այս հարցը պետք է բերել ասպարեզ: Ռուսաստանի հարցում ցանկանում եմ չսխալվենք»,- ասաց քաղաքագետը:
Խոսելով թուրքերի հնարավոր պատասխաններից`նա ասաց, որ եթե լիներ ՀՀ նախագահ, ապա կսկսեր ներգաղթի ծրագիր և բանակը կարգի կբերեր:
Բանախոսը խոսեց նաև գալիք ընտրությունների շուրջ՝ կարևորելով ազատ և արդար ընտրությունների անցկացումը: «ՀՀ նախագահը պետք է երաշխավորի ընտրությունների արդարությունը»,- ասաց Լևոն Շիրինյանը`հավելելով, որ այն պետք է դառնա նոր էլիտայի, նոր սերունդի ճանապարհ:
