Շատ մշակույթներում սնահավատ մարդիկ վախենում են այն ուրբաթ օրվանից, որը զուգադիպում է ամսվա 13-րդ օրվան։ Այլ կերպ` դա կոչվում է «սև ուրբաթ»: «Ուրբաթ, 13»-ից վախը հոգեբույժներն անվանեցին Պարասկևիդեկատրիաֆոբիա, իսկ հետագայում` Տրիսկայդեկաֆոբիա ու Տրիսկադեֆոբիա:
«Առաջին լրատվական»-ը ԵՊՀ սոցիալական հոգեբանության ամբիոնի դասախոս, հոգեբան-խորհրդատու Հասմիկ Հարությունյանի հետ զրույցում փորձեց պարզել` ինչո՞վ է պայմանավորված «ուրբաթ, 13» օրվա նկատմամբ վախը:
Վերջինս մեզ հետ զրույցում հավաստիացրեց, որ դա նախևառաջ սնահավատություն է և ոչ թե պատկանում է վախերի թվին: Ինչ վերաբերում է թվին, ապա այն համարվում է սատանայական՝ այնպես, ինչպես օրինակ` 6-ը: «Մարդկանց վախեցնում է ավելի շատ մահը, սարսափը, իսկ հոգեբանության մեջ այն, ինչ սատանայական է՝ կապված է հիմնականում մահվան հետ»,- հավելեց նա:
«Վախերը բազմաթիվ են, դա սնահավատություն է, իսկ մարդիկ առաջնորդվում են հաճախ կարծրատիպերով ու որոշել են, որ դա բացասական է: Պարզապես 13-ը համարվում է «սատանայի դյուժինա»»,- հավելեց հոգեբանը` նշելով, որ շատ մարդկանց համար սնոտիապաշտությունը հաճախ պաշտպանիչ բնույթ է կրում` պաշտպանելով նրան որոշակի անորոշությունից:
«Եթե մարդը գիտի` ինչ-որ բան բացասական է, նա խուսափում է դրանից, սակայն եթե մարդը մտածում է` իր հետ ինչ-որ վատ բան է կատարվելու, ուրեմն նա կներշնչի իրեն, որ իր հետ դրա հետևանքվ վատ բան կատարվի»,- հավելեց Հ. Հարությունյանը:
