Բրիտանական BBC հեռուստաընկերությունը երեկ անդրադարձել է Առաջին համաշխարհային պատերազմի ժամանակ իրականացված Հայոց ցեղասպանության հիմնախնդրին՝ ընդգծելով, որ հայերի զանգվածային սպանությունները շարունակում են մնալ զգայուն հարց.
«Այն ժամանակ, երբ պատմաբանները շարունակում են վիճարկել այդ իրադարձությունները, Թուրքիան ընդդիմանում է և չի ցանկանում 1915-1916 թվականներին իրականացված այդ սպանությունները ճանաչել որպես ցեղասպանություն։ Գոյություն ունեն բազմաթիվ տվյալներ, որոնք վկայում են այդ տարիներին հայերի նկատմամբ իրականացված թուրքական գազանությունների մասին։
Փաստ է, որ 1915-1916 թվականներին զոհվել են հարյուր հազարավոր հայեր, երբ թուրքերը նրանց զանգվածաբար բռնագաղթեցրել են Արևելյան Անատոլիայից (Արևմտյան Հայաստան) դեպի սիրիական անապատ և այլ վայրեր։ Այնտեղ նրանք կա՛մ սպանվել են, կա՛մ էլ մահացել են սովից ու հիվանդություններից։
Զոհված հայերի ընդհանուր թիվը շարունակում է մնալ վիճարկելի։ Հայերը խոսում են 1.5 միլիոն զոհերի մասին, իսկ Թուրքիան՝ 300,000։ Մինչդեռ Ցեղասպանությունների հետազոտման միջազգային ասոցիացիայի (IAGS) տվյալներով՝ զոհվել է ավելի քան 1 միլիոն մարդ։
IAGS-ը 2005 թվականին նամակ է գրել Թուրքիայի վարչապետ Ռեջեփ Էրդողանին, որում նշել է, որ ոչ միայն հայերն են համոզված Հայոց ցեղասպանության եղելության մեջ, այլև՝ ցեղասպանությունների հետազոտմամբ զբաղվող գիտնականների ճնշող մասը։ Սակայն թուրք պաշտոնատար անձինք ընդունում են միայն այն, որ հայերի նկատմամբ գազանություններ են իրագործվել՝ պնդելով, թե քրիստոնյա հայ ժողովրդին համակարգված ձևով ոչնչացնելու փորձեր «չեն ձեռնարկվել»։
BBC-ն անդրադարձել է նաև հայ-թուրքական հարաբերությունների կարգավորմանը. «2009 թվականին Հայաստանն ու Թուրքիան համաձայնագիր ստորագրեցին դիվանագիտական հարաբերությունների հաստատման ու սահմանի բացման մասին։ Սակայն այդ արձանագրությունները ցայժմ չեն վավերացվել երկու երկրների խորհրդարանների կողմից։ Այդ պլանում խնդիր է հարուցում Ղարաբաղյան սառեցված հակամարտության հարցում փոխադարձ կասկածամտությունը։ Թուրքիան այդ հարցում աջակցում է Ադրբեջանին»։
