Stratfor. «Ադրբեջանը հասկանում է, որ անհնար է միայնակ հակամարտության մեջ մտնել Հայաստանի հետ, որի թիկունքում ՌԴ-ն է»

Անդրադառնալով Ադրբեջանի խորհրդարանի կողմից Թուրքիայի և Ադրբեջանի միջև կնքված ռազմավարական համագործակցության և փոխադարձ օժանդակության մասին բազմակողմանի համաձայնագրի վավերացմանը՝ հեղինակավոր «Stratfor» վերլուծական կենտրոնը նշել է. «Եթե կողմերից մեկը զինված հարձակման կամ ագրեսիայի ենթարկվի երրորդ պետության կամ պետությունների խմբի կողմից, կողմերը կիրականացնեն երկկողմանի օժանդակություն» և «երկու պետությունները համագործակցելու են ազգային անվտանգությանն ուղղված մարտահրավերներն ու վտանգները չեզոքացնելու հարցում»: Հոդվածում այնուհետև նշվում է. «Այս առիթով հարց է ծագում` անհրաժեշտության պահին Թուրքիան իր խոսքի տերը կլինի՞ Ադրբեջանին պաշտպանելու հարցում: Երբ Թուրքիան ցանկացավ կարգավորել Հայաստանի հետ հարաբերությունները, Ադրբեջանն այնպիսի կեցվածք ընդունեց, թե մինչև ԼՂ հարցը չլուծվի, Անկարան նույնիսկ չպետք է մտածի հայ-թուրքական հարաբերությունների կարգավորման մասին: Սակայն Թուրքիան ինչ-որ չափով անտեսեց Ադրբեջանի դիրքորոշումը, ինչն էլ հանգեցրեց այս երկու երկրների միջև հարաբերությունների վատացմանը: Այս իրավիճակում շահեց Ռուսաստանը` ցույց տալով Թուրքիային, որ Կովկասում ինքը մնում է դոմինանտ, և´ Հայաստանի, և´ Ադրբեջանի հարցում Թուրքիան պարտվեց»:
Հոդվածի հեղինակը նկատում է, որ չնայած Ռուսաստանը ցույց է տալիս, թե մտադրություն չունի ռազմական հակամարտության դեպքում միանալ Հայաստանին, միևնույն է, Ադրբեջանը հասկանում է, որ անհնար է միայնակ հակամարտության մեջ մտնել Հայաստանի հետ, որի թիկունքում Ռուսաստանն է: «Վերոնշյալ փաստը Ադրբեջանին դրդեց կրկին Թուրքիայի գիրկը նետվել»,- բխեցնում է «Stratfor»-ի վերլուծաբանը: