ՀՀ փոխվարչապետ, տարածքային կառավարման նախարար Արմեն Գևորգյանն այսօր աշխատանքային այցով մեկնել էր Սյունիքի մարզ:
Տարածքային կառավարման նախարարության հասարակայնության հետ կապերի բաժնից «Առաջին լրատվական»-ին տեղեկացնում են, որ Սիսիանում փոխվարչապետը մասնակցել է տարածաշրջանի համայնքների միության կողմից իրականացված «Համատեղ ուժերով զարգացնենք համայնքը» ծրագրի շնորհանդեսի արարողությանը, որի ընթացքում ներկայացվել են միության կազմում ընդգրկված համայնքների գույքահարկի և հողի հարկի ավտոմատացված համակարգի ցանցը, միության կայքը:
Համակարգի շնորհիվ համայնքների գույքահարկի և հողի հարկի բազաների կառավարումը կդառնա առավել արդյունավետ, համայնքներն իրական ժամանակի ռեժիմով կարող են ծանոթանալ իրենց բազաներին:
Ներկայացվեցին նաև ծրագրի շրջանակում մշակված միջհամայնքային համագործակցության հինգ նախագծեր, որոնք մասնավորապես վերաբերում են համայնքներում աղբահանության կազմակերպմանը, միջհամայնքային ճանապարհների բարեկարգմանը, համայնքային կարևորության այլ խնդիրների:
Նշված ծրագրերը կյանքի կոչելու համար Սիսիանի համայնքների միությունը մտադիր է դիմել դոնոր կազմակերպություններին: «Համատեղ ուժերով զարգացնենք համայնքը» ծրագիրն իրագործվել է ԱՄՆ ՄԶԳ աջակցությամբ «Քաունթերփարթ ինթերնեշնլ» կազմակերպության կողմից իրականացվող «Քաղաքացիական հասարակության և տեղական ինքնակառավարման աջակցության ծրագրի» շրջանակում:
Փոխվարչապետը գոհունակություն հայտնելով ավտոմատացված ցանցի ներդրման առնչությամբ` հույս հայտնեց, որ այն կնպաստի համայնքների կողմից սեփական եկամուտների հավաքագրման արդյունավետության և բյուջետային կարգապահության բարձրացմանը:
Նա կարևորել է ծրագրի կիրառությունը համայնքային մյուս միությունների կողմից: Փոխվարչապետը հետաքրքիր համարեց նաև միջհամայնքային համագործակցության ծրագրերը` պատրաստակամություն հայտնելով աջակցել դրանց իրագործման համար ռեսուրսներ գտնելու հարցում:
Այցի շրջանակում փոխվարչապետը Սիսիան և Գորիս քաղաքներում մասնակցել է փոստային մասնաճյուղերի, իսկ Տաթև համայնքում`փոստային բաժանմունքի վերաբացման արարողություններին:
«Հայփոստ» ՓԲԸ հավատարմագրային կառավարիչ «Հայփոստ Թրաստ Մենեջմենթ»-ը մարզերում շարունակում է արդիականացման ծրագիրը: Միայն այս տարի մարզերում վերաբացվել է արդիականացված 38 բաժանմունք, ծրագիրը շարունակական է, և հաջորդ տարի նախատեսվում է արդիականացնել ևս 35-ը: Նշվել է, որ մինչև տարեվերջ կնորացվեն և կվերաբացվեն նաև Ագարակի, Քաջարանի, Կապանի փոստային բաժանմունքները:
Վերազինված բաժանմունքների միջոցով քաղաքացիներին ավելի արագ և օպերատիվ փոստային, ֆինանսական և կոմերցիոն ծառայություններ կմատուցվեն: Բաժանմունքներում փոխվել և նորացվել են ենթակառուցվածքները, տեղադրվել են արդի ծրագրերին համապատասխանող նոր համակարգիչներ, նորացվել է մալուխային համակարգը:
Փոխվարչապետը շրջայց է կատարել է նորացված բաժանմունքներում, ծանոթացել պայմաններին, կատարված աշխատանքներին: Նա դրական է գնահատել արդյունքները` հատկապես կարևորելով այն, որ հեռավոր մարզերի բնակիչներին ևս հասանելի են դառնում որակյալ ծառայությունները:
Տաթևի վերաբացված փոստային բաժանմունքում փոխվարչապետը խորհրդակցություն է անցկացրել «Տաթևի վերածնունդ» զբոսաշրջային ծրագրի իրականացման ընթացքի քննարկման նպատակով:
Մասնակցել են Սյունիքի մարզպետ Ս. Խաչատրյանը, Հայաստանի ազգային մրցունակության հիմնադրամի գործադիր տնօրեն Ա. Խաչատուրյանը, տարածաքային կառավարման, քաղաքաշինության, մշակույթի նախարարությունների ներկայացուցիչներ, համապատասխան համայնքների ղեկավարներ:
Անդրադարձ եղավ անհրաժեշտ ենթակառուցվածքների ձևավորմանը, իրավական կարգավորում պահանջող հարցերին, կարևորվել շահագրգիռ մարմինների համագործակցված աշխատանքը: Փոխվարչապետը տարածքային և տեղական իշխանությունների ներկայացուցիչներին հորդորել ամենայն աջակցություն ցուցաբերել ծրագրի իրականացմանը:
