Սոցիոլոգ Ահարոն Ադիբեկյանը կարծում է, որ ՆԱՏՕ-ին անդամակցելու համար Վրաստանին առնվազն երկու տասնամյակ է հարկավոր՝ մինչև այդ երկիրն իր ամբողջ օրենսդրությունը համապատասխանեցնի եվրոպական պահանջներին: Նման տեսակետ նա հայտնեց «Առաջին լրատվական»-ի հետ զրույցում:
Անդրադառնալով հարցին՝ ի՞նչ կերպ կազդի Վրաստանի անդամակցությունը տարածաշրջանի, մասնավորապես Հայաստանի վրա՝ սոցիոլոգը նկատեց, որ Ռուսաստանի համար այնքան էլ կարևոր խնդիր չէ՝ ո՞ւմ հովանու ներքո այսուհետ կգտնվի Վրաստանը: «Բայց բոլոր դեպքերում մեզ համար այնքան էլ լավ չէ, որ ՆԱՏՕ-ն մեր կողքին լինի: Առկա է Իրանի խնդիրը, և ՆԱՏՕ-ի տարածաշրջանային ներկայությամբ լարվածությունը կմեծանա՝ ծնելով բազմաթիվ խնդիրներ: Իրանը միշտ էլ Ռուսաստանի հովանու տակ է գտնվել, պատմականորեն Ռուսաստանը միշտ պաշտպանել և աջակցել է նրան: Հիմա, եթե հանկարծ Իրանի վրա հարձակման փորձ կատարվի, ռուսները անպայման ինչ-որ կերպ կարձագանքեն: Ամեն դեպքում, մեզ այս առումով ոչ մի լավ բան չի սպասվում: Եթե հարևան երկրում պատերազմ է, պարզ է, որ խնդիրներ կառաջանան նաև մեզ մոտ»,- նկատեց Ահարոն Ադիբեկյանը:
Սոցիոլոգի կարծիքով՝ Վրաստանի ՆԱՏՕ-ին անդամակցելը բարդ անդրադարձ կունենա նաև ղարաբաղյան հակամարտության վրա: «Լեռնային Ղարաբաղի հարցը բավական յուրահատուկ, միջազգային իրավունքի խնդիր է, և դժվար թե նման քայլը կարողանա ազդել հարցի կարգավորման վրա: Բոլոր դեպքերում Հայաստանը Ռուսաստանի ռազմահենակետն է, այնպես որ, մեր երկրում ցանկացած պահի կարող են հրթիռներ, և այլ ռազմամթերք հայտնվել: Միակ լավ բանը, որ կարող է լինել Վրաստանի` ՆԱՏՕ-ի անդամակցությունից, այն է, որ Հայաստանի նշանակությունը Ռուսաստանի համար կտրուկ կմեծանա: Ռուսաստանը կաշխատի, որ Հայաստանը հայաթափ չլինի, միգրացիոն հոսքերը կանգնեն, ներդրումներ արվեն և այլն»,- ամփոփեց Ահարոն Ադիբեկյանը:
