Կառավարության մամլո ծառայությունից «Առաջին լրատվական»-ին տեղեկացնում են, որ 1988թ. ավերիչ երկրաշարժի 23-րդ տարելիցի կապակցությամբ վարչապետ Տիգրան Սարգսյանն այցելել է Լոռու և Շիրակի մարզեր:
Կառավարության ղեկավարը ծաղկեպսակներ է դրել Սպիտակում և Գյումրիում կանգնեցված երկրաշարժի զոհերի հիշատակը հավերժացնող հուշարձաններին և մեկ րոպե լռությամբ հարգել անմեղ զոհերի հիշատակը:
Տ. Սարգսյանի մասնակցությամբ Ամասիայում բացվել են հիմնանորոգված մանկապարտեզի և համայնքային կենտրոնի, ինչպես նաև բուժհաստատության մասնաշենքերը:
Ամասիայի մանկապարտեզը հնարավորություն ունի ընդունելու 60 երեխայի: Շենքի առաջին հարկում տեղակայված են մանկապարտեզի վարչական հատվածները, բուժկետը, խաղասենյակը, հավաքատեղին, համակարգչային սենյակը, իսկ երկրորդ հարկն ամբողջությամբ նախատեսված է մանկապարտեզի երկու երեսուն հոգանոց խմբերի համար, որոնցից յուրաքանչյուրն ունի ննջարան, խաղասենյակ, հանդերձարան, սանհանգույց:
Շենքի երկրորդ հարկում տեղակայված է նաև 80 հոգու համար նախատեսված հանդիսությունների դահլիճ, որը կարող է օգտագործվել նաև համայնքային նշանակության հանդիսավոր իրադարձությունների համար:
Հաստատության հիմնանորոգումն իրականացվել է Հայաստանի սոցիալական ներդրումների հիմնադրամի ֆինանսավորմամբ: Ծրագրի շինարարական աշխատանքների ընդհանուր արժեքն է 100 միլիոն դրամ:
Ամասիայի բուժհաստատությունն սպասարկում է համայնքի և նրան հարակից բնակավայրերի շուրջ 9 հազար բնակչի: Բուժկենտրոնն ունի ծննդատուն, պոլիկլինիկա և շտապօգնության ծառայություն, որոնք համալրված են անհրաժեշտ բուժսարքավորումներով:
Ծրագրի շինարարական աշխատանքների ընդհանուր արժեքը 88 միլիոն դրամ է:
Վարչապետն այցելել է նաև Ամասիայի WKS տեքստիլ արդյունաբերության գործարան, որտեղ կառավարության ղեկավարին է ներկայացվել գործարանի արտադրական գործընթացը:
Գործարանն ունի 105 աշխատող, որի արտադրանքն ամբողջությամբ արտահանվում է Գերմանիա: