Հայ-ադրբեջանական հիմնախնդրի կարգավորման հարցում նոր առաջարկներ չեն լինի: Այսօր լրագրողների հետ հանդիպմանը նման տեսակետ հայտնեց քաղաքագետ Ալեքսանդր Մարկարովը`խոսելով Լեռնային Ղարաբաղի հիմնախնդրի կարգավորման գործընթացի վերաբերյալ երեկ ընդունված հնգակողմ հայտարարության մասին:
Նա փորձեց վերլուծել այն փաստաթուղթը, որը ներկայացվեց: Ըստ նրա` առաջին կետն այն է, որ բոլոր կողմերը համաձայն են խնդրի կարգավորման խաղաղ ճանապարհին: Ա. Մարկարովի կարծիքով` սա գերակայություն է բոլոր կողմերի համար: Երկրորդ դրույթը, որի մասին խոսեց քաղաքագետը, ԵԱՀԿ Մինսկի խմբին էր վերաբերում:
«Այս ձևաչափին բոլոր կողմերը համաձայն են, և սա հակահարված է Ադրբեջանի հռետորիկային»,- մեկնաբանեց Ա. Մարկարովը` հավելելով, որ մտահոգության տեղիք է տալիս միայն ստատուս քվոյին վերաբերող դրույթը:
Հաջորդ կոչը հրադադարի խախտման դեմ անհրաժեշտ մեխանիզմներ ստեղծելու մասին է: Ըստ նրա` այս կոչն ուղղված է Ադրբեջանին և էլի հարված է այդ երկրի ռազմական հռետորիկային:
Անդրադառնալով խնդրի շուրջ նոր լուծումներին և առաջարկներին` ասաց, որ սեղանին նոր առաջարկներ չկան: Նրա համոզմամբ` նոր բանակցությունների հիմք չկա:
«Համանախագահողները չեն պատրաստվում նոր առաջարկներ անել: Պետք է ուսումնասիրել սեղանին դրվածը»,- կարծում է քաղաքագետ Մարկարովը` հավելելով, որ մոտակա ժամանակահատվածում բանակցային գործընթացը որևէ տեղ չի տանելու:
Հիշեցնենք, որ երեկ Վիլնյուսում մեկնարկեց Եվրոպայում անվտանգության և համագործակցության կազմակերպության արտգործնախարարների խորհրդի 18-րդ նստաշրջանը, որի առաջին օրը նշանավորվեց ԵԱՀԿ Մինսկի խմբի համանախագահ երկրների պատվիրակությունների ղեկավարների` Ռուսաստանի արտգործնախարար Սերգեյ Լավրովի, Միացյալ Նահանգների պետքարտուղար Հիլարի Քլինթոնի, Ֆրանսիայի Եվրոպական հարցերով նախարար Ժան Լեոնետիի, Հայաստանի և Ադրբեջանի արտգործնախարարներ Էդվարդ Նալբանդյանի, Էլմար Մամեդյարովի համատեղ հայտարարությամբ, որում վերահաստատեցին ղարաբաղյան հիմնախնդրի խաղաղ կարգավորման կարևորությունը:
