Ընթացիկ տարին մոտենում է ավարտին։ Թե ինչպիսին էր տարին «Էմփիրեյ» խմբի անդամ, երգահան Գիսանե Պալյանի համար, փորձեցինք իմանալ հենց նրանից։
«Առաջին լրատվական»-ի հետ զրույցում Գ. Պալյաննն ասաց, որ տարին բուռն է եղել թե՛ ստեղծագործական, թե՛ անձնական առումներով, քանի որ լույս աշխարհ է եկել նրա երրորդ զավակը՝ տղան։
Ինչ վերաբերում է ստեղծագործական կյանքին, ապա, նրա խոսքով, չնայած այն հանգամանքին, որ ինքը զբաղված է եղել «Շանթ» հեռուստաընկերության «Իքս ֆակտոր» նախագծով, սակայն զուգահեռ զբաղվել է նաև ստեղծագործական բուռն կյանքով, ինչը չի սահմանափակվել միայն «Էմփիրեյ» ռոք խմբի շրջանակում։
«Երգեր եմ գրել թե՛ խմբի համար, թե՛ իմ: Այս տարի լույս տեսավ «Էմփիրեյի» երրորդ ձայնասկավառակը, իմ «Մեկընդմիշտ» երգի հիման վրա նկարահանվեց տեսահոլովակ»,- հայտնեց Գ. Պալյանը՝ հավելելով, որ հասցրել է գրել նաև սաուդթրեքներ սերիալների համար, երգեր է գրել տարբեր երգիչների համար, որոնց մի մասը մշակման ու գործիքավորման փուլում են։
Նրա խոսքով՝ աշխատել է մանկական մյուզիքլների համար, որոնք օգտագործվել են տարբեր միջազգային մրցույթներում։
«Իհարկե, շատ ու շատ անելիքներ դեռ կան մյուս տարվա համար։ Շատ պլաններ ունեմ, որոնք առաջին հերթին կապված են «Էմփիրեյի» հետ։ Մի մտահղացում ունենք, որը կապված է Կոմիտասի երգերի հետ»,- տեղեկացրեց նա՝ հայտնելով, որ արդեն 1-2 տարի է, ինչ ինքն ու ամուսինը՝ «Էմփիրեյի» սոլո կիթառահարը, միասին մտածում են՝ ինչպես կարելի է վերամշակել երգերը ու դրանք ներկայացնել խմբի պատկերացմամբ։
«Դա Կոմիտասի պրոպագանդման ճանապարհին ևս մեկ քայլ կլինի, ինչը շատ կարևոր կլինի։ Սակայն դեռ չենք շտապում, քանի որ շատ պատասխանատու գործ է, ու մեծ պատասխանատվությամբ դա պետք է արվի»,- ասաց Գ. Պալյանը։
