«Նոր ժամանակներ» կուսակցության առաջնորդ Արամ Կարապետյանը Ռուսաստանում Պետդումայի ընտրությունների բավականին հետաքրքիր ընթացք է կանխատեսում: Նման տեսակետ նա հայտնեց «Առաջին լրատվական»-ի հետ զրույցում:
«Կարծում եմ՝ Ռուսաստանում դաշտն ընդդիմադիր է դարձել, և դաշտի որոշակի ուղղումներ կմտցվեն: Դրանից հետո, կարծում եմ, կուրսը գնալով կդառնա առավել պետականամետ և ավելի հակաարևմտամետ»,- նկատեց Արամ Կարապետյանը:
Հարցին՝ որքա՞ն մեծ է իշխող «Եդինայա Ռոսիա» կուսակցության՝ Պետդումայում մեծամասնություն կազմելու հավանականությունը, ՆԺ ղեկավարը նկատեց, որ այն մեծամասնությունը կպահպանի, բայց պարզ է, որ չի ունենա սահմանադրական մեծամասնություն: «Վերջնական թվերը, կարծում եմ, կլինեն 50-53 տոկոս: Ինչ վերաբերում է կոմունիստներին, ապա նրանք իրենց ներկայությունը մի փոքր կավելացնեն, մնացածները կմնան մոտավորապես նույն թվաքանակներով»,- նկատեց Արամ Կարապետյանը:
Հիշեցնենք, որ Պետդումայի ընտրությունները Ռուսաստանում տեղի կունենան դեկտեմբերի 4-ին:
