Կառավարության` ավտոմեքենաների տեխզննման կարգի մասին վերջին որոշումից հետո էլ տեխզննման որոշ կետերում վարորդներից շարունակում են դրամ շորթել:
Այսօր կայացած մամուլի ասուլիսում այս մասին հայտարարեց ավտովարորդների իրավունքների պաշտպանության «Աքիլես» ՀԿ նախագահ Էդուարդ Հովհաննիսյանը:
«Պարզելու համար`մեքենան սարքին վիճակում է, թե ոչ, անհրաժեշտ է ստուգումներ իրականացնել 64 չափորոշիչներով, մինչդեռ տեխզննման կետերում ստուգում են ընդամենը 3-4 չափորոշիչներ: Մեզ մոտ միայն դիագնոստիկա են անում, և տեխզննման կետի առաքելությունն ավարտվում է: Քաղաքացին բանկում համապատասխան վճարում կատարելուց հետո պետք է գնա, հետամուտ լինի իր ավտոմեքենայի վիճակի վերահսկողությանը:
Միաժամանակ, սակայն, տեխզննում անցնելու վերաբերյալ բանկից կտրոն վերցնելուց հետո վարորդներն ուղղակի կարող են չգնալ տեխզննման: Եթե կլինեն վարորդներ, ովքեր ունեն տեխզննման մասին փաստաթուղթը, սակայն դիմապակուն միայն չփակցնելու պատճառով տուգանվել են, թող դիմեն մեզ: Նման դեպք եղել է, որը մեր միջնորդությամբ արագ շտկվել է»,- նկատեց Հովհաննիսյանը:
Նա նաև նշեց` իրենց ՀԿ-ն կողմ է, որ տեխզննման ենթարկվեն բեռնատարները, փոխադրամիջոցները, սակայն մարդատար մեքենաները` ոչ:
«Կենտրոնական բանկին առաջարկել ենք, որ տեխզննման գործընթացը վերահսկվի ԱՊՊԱ-ի կողմից, քանի որ վերջիններս են շահագրգիռ, որ ավտոմեքենաները տեխնիկապես լավ վիճակում լինեն»,- ասաց «Աքիլես» ՀԿ նախագահ Էդուարդ Հովհաննիսյանը`հավելելով, որ վիճակագրական տվյալներ չկան` քանի ավտոմեքենա է այս տարի հանրապետությունում տեխզննում անցել:
Հովհաննիսյանը հիշեցրեց, որ ավտոմեքենաների տեխզննման կտրոններ տրամադրում են «Հայէկոնոմբանկ»-ը, «Պրոմեթեյ», «Արարատ» բանկերը, ինչպես նաև «Հայ բիզնես բանկն» ու «Կոնվերս բանկը»:
Նշենք, որ ավտոմեքենաների տեխզննման վերաբերյալ օրենքը ընդունվել է 2006 թվականին, սակայն ուժի մեջ է մտել 2007-ին: Համապատասխան կետում տեխզննման համար վարորդը պարտավոր է վճարել 5500 դրամ, բանկից համապատասխան կտրոն ստանալու համար` 2500 դրամ:
5 տարվա շահագործումից հետո մեքենաները տեխզննում պետք է անցնեն ամեն տարի, մինչև 5 տարվա շահագործում ունեցողները` երկու տարին մեկ:
