«Նովոստի» մամուլի սրահում հրավիրված Երևան-Մոսկվա-Աստանա- Կիև տեսակամուրջի թեման վերաբերում էր գիտատեխնիկական ոլորտում միջպետական գործակցության զարգացմանը, նոր տեխնոլոգիաների ներդրմանն ու համատեղ նախագծերի իրականացմանը: ՌԳԱ ժողտնտեսական կանխատեսումների ինստիտուտի գիտատեխնիկական զարգացման կազմակերպչական-տնտեսական խնդիրների կառավարման լաբորատորիայի վարիչ, պրոֆեսոր Նիկոլայ Կոմկովը նշեց, որ ներդրումային պոտենցիալը կարող է իրականացվել ցանցային համակարգով: Ըստ Կոմկովի` ներդրումային նախագծերը պետք է կիրառվեն ոչ միայն շուկայում, այլև տեխնոլոգիաներում, քանի որ դրանք շուկայում կիրառելը բարդություններ է առաջ բերում: Նա կարծիք հայտնեց, որ ներդրումային ծրագրերի համար անհրաժեշտ են նաև արտերկրի բուհերի պատվերները: ՀՀ-ում տեղեկատվական տեխնոլոգիաների ընկերությունների միության գործադիր տնօրեն Կարեն Վարդանյանը նշեց, որ այսօր նույնիսկ աֆրիկյան պետություններն են խոսում նորարարական ծրագրերի առաջնահերթությունների մասին: Նա հիշեց Սինգապուրի օրինակը, երբ երիտասարդ մարդիկ քսան տարի առաջ կարողացան փոխել իրավիճակը: Կարեն Վարդանյանը կարծում է, որ ինովացիան աշխարհը փոխելու ձև է, և շատ կարևոր է հասկանալը, թե ինովացիոն ծրագրերը ինչպես պետք է զարգացնել ԱՊՀ նախկին երկրներում: Քննարկման մասնակիցները կարծիք հայտնեցին նաև, որ առանց բիզնեսի աջակցության հնարավոր չէ իրականացնել ինովացիոն ծրագրեր:
