Ոչ մի էական տարբերություն չկա մի քանի օր առաջ և այսօր նախարարության դիրքորոշման մեջ Թռչկան ջրվեժի վերաբերյալ: Այսօր «Առաջին լրատվականի» հետ զրույցում` մեկնաբանելով երեկ Կառավարության շենքի առջև Բնապահպանության նախարարի ելույթն, ասաց «Բուրգ» երիտասարդական բնապահպանական ՀԿ նախագահ, «Պահպանենք Թռչկանի ջրվեժը» նախաձեռնության ակտիվիստ Արման Վերմիշյանը: «Նրանք մի քանի օր առաջ և երեկ նույն բանն էին ասում, ոչ մի փոփոխություն չկա:
«Շեշտը դրվում է գարնան վարարումների վրա: Խնդիրն այն է, որ երբ մենք խոսում ենք բնության հուշարձանի մասին, որը ջրվեժ է, մեր որոշելիքը չէ, թե ինչքան ջուր պետք է հոսի ջրվեժով և երբ:
Բնական է, որ գարնան վարարումների ժամանակ ավելի շատ ջուր պետք է հոսի ջրվեժով, քան ամռանը»,- մեկնաբանեց Ա. Վերմիշյանը`հավելելով, որ Բնապահպանության նախարարության մեկնաբանությամբ օգտագործվելու է ավելորդ ջուրը: «Պետք է նրանց հարց տալ` ի՞նչ է նշանակում ավելորդ ջուր, եթե դույլից է ավելորդ ջուր թափվում կհասկանայինք, բայց ի՞նչ է նշանակում ջրվեժի ավելորդ ջուր: Տարօրինակ է
և չպետք է մոռանալ, որ ջրվեժը բնական հուշարձան է»,- ասաց բնապահպան ակտիվիստը:
Անդրադառնալով նախարարության խոստացած հանրային քննարկմանը`ընդգծեց, որ բնապահպանները բոյկոտ կանեն, եթե նույն բանը պետք է ասվի:
«Մենք հիմա ավելի մեծ թափով ենք սկսելու մեր գործունեությունը, որովհետև, ինչպես ասացի, մոտեցումը, որը կար նախկինում փորձում են ներկայացնել այնպես, ասես որոշակի փոփոխություններ են արվել»,- նշեց Ա. Վերմիշյանը` դա համարելով անընդունելի: Այն հարցին, թե որոնք են լինելու «Պահպանենք Թռչկանի ջրվեժը» նախաձեռնության հետագա քայլերը, եթե որևէ էական փոփոխություն չլինի, ասաց, որ դեռ չի ցանկանա հետագա քայլերից խոսել, պարզապես հիմա կան քայլեր, որոնք չէին ցանկանում իրականացնել, բայց այլ ելք չունեն:
Բնապահպանը հավաստիացրեց, որ կլինեն ակցիաներ և ավելի մարդաշատ գործողություններ: Թեմայի առնչությամբ «Առաջին լրատվականը» զրուցեց նաև «Հանուն կայուն մարդկային զարգացման» ՀԿ նախագահ Կարինե Դանիելյանի հետ, ով կիսեց Արման Վերմիշյանի կարծիքը: Նա նաև կասկած հայտնեց, թե հէկ կառուցեղ ընկերությունը նախապես սահմանված ջրից ավելին չի վերցնի: «Հյուսիսային պողոտայի շենքերը Օպերայի շենքից բարձր չպետք է լինեին, բայց ի՞նչ ունենք այսօր»
Նշենք, որ Թռչկանի ջրվեժը, որը գտնվում է Շիրակի և Լոռու մարզերի սահմանային հատվածում` Չիրխան գետի վրա և իր բարձրությամբ առաջինն է հանրապետությունում, Հայաստանի բնության գեղեցիկ հրաշալիքներից մեկն է: Իր ջրառատության ցուցանիշով ևս Թռչկանն առաջինն է Հայաստանում: Այս ամենը հաշվի առնելով՝ ՀՀ կառավարությունը ջրվեժը ներառել է ՀՀ բնության հուշարձանների ցանկի մեջ՝ որպես ջրագրական հուշարձան:
