Իտալիայում անոմալ շոգի պատճառով 22 քաղաքներում, այդ թվում՝ մայրաքաղաք Հռոմում, հայտարարվել է եղանակային վտանգի ամենաբարձր՝ կարմիր մակարդակը։ Հաղորդվում է, որ հունիսի 30-ին և հուլիսի 1-ին նախազգուշացումը կընդլայնվի՝ ընդգրկելով արդեն 25 քաղաք։ Վտանգի գոտում են հայտնվել նաև Բարին, Բոլոնիան, Վենետիկը, Ջենովան, Նեապոլը, Ֆլորենցիան և Միլանը։
Օդերևութաբաններն ու առողջապահության մասնագետները բնակիչներին հորդորում են խստորեն պահպանել անվտանգության կանոնները։ Հատկապես երեխաներին, տարեցներին և խոցելի խմբերին խորհուրդ է տրվում հնարավորինս մնալ տանը, շատ հեղուկ օգտագործել և խուսափել արևի տակ երկար մնալուց ու ֆիզիկական ծանրաբեռնվածությունից։
La Repubblica-ի տեղեկություններով՝ Լիգուրիա շրջանում օդորակիչների զանգվածային օգտագործման հետևանքով էլեկտրացանցերը գերծանրաբեռնվել են, ինչի պատճառով որոշ վայրերում էլեկտրամատակարարման խափանումներ են գրանցվել։ Հիշեցնենք, որ Եվրոպայում ծայրահեղ շոգի մեկ շաբաթվա ընթացքում մահացել է ավելի քան 1300 մարդ, ինչը ևս մեկ անգամ ընդգծում է կլիմայական ծայրահեղ երևույթների վտանգավոր հետևանքները։
