Հոկտեմբերի 5-ին, ժամը 12:50-ի սահմաններում Տավուշի մարզի Չինարի գյուղի ուղղությամբ տեղակայված մարտական հենակետում հակառակորդի դիպուկահար կրակից տարբեր աստիճանի հրազենային վիրավորում են ստացել ՀՀ զինված ուժերի ժամկետային զինծառայողներ Հենրիկ Ռաֆիկի Խաչատրյանը /ծնված 1992թ., Ախուրյանի զինկոմիսարիատ/ և Խաչատուր Հրանտի Սուքիասյանը /ծնված 1992թ., Մարտունու զինկոմիսարիատ/: Կատարվում է հետաքննություն:
ՀՀ պաշտպանության նախարարի մամուլի քարտուղար Դավիթ Կարապետյանի մեկնաբանությունը հոկտեմբերի 5-ին ադրբեջանական կողմի դիպուկահար գործողությունների կապակցությամբ:
Ադրբեջանի զինված ուժերի դիպուկահար գործողությունները, որոնց հետևանքով հոկտեմբերի 5-ին ՀՀ Տավուշի մարզի Չինարի գյուղի ուղղությամբ տեղակայված մարտական հենակետում հրազենային վիրավորում են ստացել ժամկետային զինծառայողներ Հենրիկ Ռաֆիկի Խաչատրյանը և Խաչատուր Հրանտի Սուքիասյանը, իսկ Լեռնային Ղարաբաղի Հանրապետությունում զոհվել է զինծառայող Յուրի Արամի Սարգսյանը, ցույց է տալիս, որ Ադրբեջանը ոչ միայն արհամարհում է հրադադարի ռեժիմը պահպանելու միջազգային հանրության կոչերը, այլև վտանգում է տարածաշրջանի փխրուն կայունությունը` ինքնաբերաբար պատասխանատվություն կրելով բոլոր անցանկալի հետևանքների համար:
