Ստրասբուրգում եվրոպական նախարարական համաժողովին մասնակցող Արարատ Միրզոյանը մտքեր է փոխանակել ԵԱՀԿ գործող նախագահ, Մալթայի ԱԳ նախարար Իեն Բորջի հետ, ինչպես հայտնում է Հայաստանի ԱԳՆ-ն: Այստեղ ուշադրության արժանին այն է, որ Բորջը օրեր առաջ էր Հայաստանում՝ ռեգիոնալ այցի շրջանակում: Հայաստանից նա մեկնել էր Բաքու:
Հազիվ թե Հայաստանի ԱԳՆ-ն պարզապես միջանցքային շփումը որոշել է մատուցել հանրությանն իբրեւ տեղեկատվություն՝ մտքերի փոխանակման համատեքստում, նախարարի բուռն աշխատանքային ռեժիմի տպավորություն ստեղծելու համար: Համենայն դեպս, ԱԳՆ տարածած հաղորդագրության մեջ առկա է «մտքերի փոխանակման» բովանդակային արձանագրում էլ՝ «ի շարունակություն Երևան այցի ժամանակ կայացած քննարկումների՝ անդրադարձ է կատարվել ԵԱՀԿ օրակարգային հարցերի և տարածաշրջանային թեմաների՝ Հարավային Կովկասում անվտանգային իրավիճակի շեշտադրումով»:
Միրզոյանն ու Բորջը Երեւանում ինչ որ բան թողել էին կիսա՞տ, այն դեպքում, երբ հանդիպում է եղել նաեւ Հայաստանի վարչապետի հետ, թե՞ Բորջի ռեգիոնալ այցից, մասնավորապես Երեւան անցից հետո ի հայտ են եկել նոր հանգամանքներ, որոնք առաջացրել են «մտքերի փոխանակման» անհրաժեշտություն: Իսկ այստեղ կա նկատելու բան: Մասնավորապես, Երեւանից Բաքու մեկնած Բորջը այնտեղ Իլհամ Ալիեւի հետ հանդիպմանը լսել է ԵԱՀԿ Մինսկի խումբը եւ համանախագահությունը լուծարելու մասին ալիեւյան հարցադրումը, որը լսել էր նաեւ ամիսներ առաջ՝ Մյունխենի անվտանգության համաժողովում, նույն Ալիեւի հետ հանդիպմանը:
Թե այն ժամանակ, թե օրեր առաջ Բաքվում Ալիեւին ինչ է ասել Մալթայի արտգործնախարար, ԵԱՀԿ գործող նախագահ Բորջը, հայտնի չէ: Իսկ հնարավո՞ր է, որ Ստրասբուրգում Արարատ Միրզոյանի հետ նա «մտքեր է փոխանակել» հենց այդ թեմայով, եթե հաշվի առնենք նաեւ Ալիեւի խոսքը այդ հանդիպմանը, թե՝ խումբը պետք է լուծարել եւ Երեւանը չունի դրան չհամաձայնելու պատճառ: Արդյո՞ք Բորջը հարցրել է Միրզոյանին՝ Երեւանը լուծարման օրակարգին չհամաձայնելու պատճառ ունի՞, թե ոչ: եվ ի՞նչ է պատասխանել նրան Արարատ Միրզոյանը:
