Հայաստանի տարածքային կառավարման նախարարը ապրիլի 30-ին Երեւանում հանդիպել է Իրանի ճանապարհների և քաղաքաշինության նախարարի տեղակալ և քաղաքացիական ավիացիայի կազմակերպության տնօրեն Մոհամմադ Մոհամմադի Բախշիի հետ, նրա գլխավորած պատվիրակությամբ: Պաշտոնական հաղորդագրության բովանդակությունը առավելապես վերաբերում է ավիացիայի ոլորտին, թեեւ անշուշտ հետաքրքիր կլիներ իմանալ, թե արդյո՞ք Երեւանն ու Թեհրանը քննարկում են ճանապարհաշինության ոլորտում գործակցություն ընդլայնելու հարցեր, հատկապես հաշվի առնելով Հայաստանում ռազմավարական նշանակության ճանապարհների՝ այդ թվում Իրանին կապող ճանապարհների մեղմ ասած շոշափելի խնդիրները:
Ըստ պաշտոնական հաղորդագրության, ավիացիայի ոլորտի վերաբերյալ քննարկվել են գործակցությանն առնչվող հարցեր՝ «մասնավորապես՝ օդանավերի տեխնիկական սպասարկման, մասնագետների պատրաստման և վերապատրաստման, երկու երկրների միջև չվերթերի ավելացման, ինչպես նաև տարանցիկ չվերթերի զարգացման վերաբերյալ»: Հաղորդագրությունը հայտնում է, որ իրանական կողմը Հայաստանի ավիացիայի ոլորտիի պատասխանատուներին հրավիրել են Իրան՝ իրանական ավիացիոն կազմակերպությունների ներուժը ուսումնասիրելու համար:
Հարց է առաջանում՝ իսկ ո՞րն է բուն առարկան: Շաբաթներ առաջ Հայաստանում հայտնի դարձավ Ֆլայ Արնա ավիաընկերության ծրագրի ձախողման մասին: Դա պետական ծրագիր էր, որ Հայաստանի ազգային հետաքրքրությունների հիմնադրամի մասնակցությամբ իրականացվել էր Արաբական Միացյալ Էմիրությունների Շարժայի էմիրության Էյր Արաբիա ազգային փոխադրողի հետ համատեղ: Հայաստանի պետական բյուջեից ներդրվել էր 10 միլիարդ դրամ, իսկ նորաստեղ ընկերությանը՝ Ֆլայ Արնային, տրվել էր ազգային ավիափոխադրողի կարգավիճակ:
Բայց, հազիվ մեկ տարի անց հայտարարվում է ծրագրի տապալման մասին, ընդ որում՝ հայտարարվում է վարչապետի մակարդակով, թեեւ առ այսօր որեւէ կերպ պարզ չէ, թե ով է պատասխան տալու տապալման եւ փաստացի պետական տասը միլիարդ դրամի՝ «ջուրը ընկնելու» մասին: Այժմ կա հայ-իրանակա՞ն ավիացիոն որեւէ գաղափար կամ ծրագիր: Ւրանը «սովորեցնելու» է, թե ինչպես չտապալվե՞լ ոլորտում:
