Ադրբեջանական APA լրատվական գործակալության փոխանցմամբ՝ Վիլնյուսում տեղի է ունեցել ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսի ու ԵԱՀԿ գլխավոր քարտուղար Լամբերտո Զանիերի հանդիպումը։
Հանդիպման ժամանակ կողմերը քննարկել են ԵԱՀԿ Նախարարների խորհրդի առաջիկա տարեկան նստաշրջանի առաջնահերթ խնդիրները։ Այդ նիստը տեղի է ունենալու դեկտեմբերի 6-7-ը, Վիլնյուսում։
Հանդիպման ժամանակ Աժուբալիսը հայտարարել է, որ ԵԱՀԿ տիրույթում առավել այժմեական խնդիր են չկարգավորված հակամարտությունները, ահաբեկչությունը, քիբեր անվտանգությունը, Հյուսիսային Աֆրիկայի ու Մերձավոր Արևելքի զարգացումները։ Հենց այս հարցերն էլ քննարկվելու են Վիլնյուսում կայանալիք ԵԱՀԿ նախարարների խորհրդի նստաշրջանում։
Հիշեցնենք, որ ԵԱՀԿ-ն անվտանգության հարցերով զբաղվող աշխարհի խոշորագույն տարածաշրջանային կազմակերպությունն է։ Այն ներառում է 56 երկիր, որոնք ներկայացնում են Հյուսիսային Ամերիկան, Եվրոպան ու Կենտրոնական Ասիան։