Ադրբեջանական Salam News գործակալության փոխանցմամբ՝ Ադրբեջանի նախագահ Իլհամ Ալիևը շնորհավորել է Ռուսաստանի նախագահ Դմիտրի Մեդվեդևի ծննդյան տարեդարձը։
Իր շնորհավորական ուղերձում Ալիևը գրել է. «Սրտանց շնորհավորում Ձեզ եմ ծննդյան օրվա կապակցությամբ։ Ձեր ղեկավարությամբ Ռուսաստանը վստահորեն ընթանում է պետական և ժողովրդավարական ինստիտուտների կատարելագործման, տնտեսության և սոցիալական ոլորտի արդիականացման ճանապարհով։ Միջազգային արենայում աճում է երկրի հեղինակությունը։
Դուք զգալի ներդրում ունեք Ադրբեջանի և Ռուսաստանի ավանդական բարեկամական, բարիդրացիական հարաբերությունների ամրագրման ու զարգացման գործում, որը ներկայումս ստացել է ռազմավարական գործընկերության բնույթ։ Ադրբեջանում մեծ գոհունակությամբ են ընդունում միջազգային իրավունքի նորմերի ու սկզբունքների հիման վրա ղարաբաղյան հակամարտության կարգավորման ուղղությամբ Ձեր գործադրած ջանքերը։
Վստահ եմ, որ այսուհետ նույնպես հաջողությամբ զարգանալու ու ընդլայնվելու են մեր միջպետական հարաբերությունները, բազմակողմ համագործակցությունը՝ հանուն մեր ժողովուրդների, հանուն Կովկասի խաղաղության, կայունության ու անվտանգության»։
Հիշեցնենք, որ այս տարվա օգոստոսի 9-ին Ալիևն ու Մեդվեդևը հանդիպեցին Սոչիում՝ քննարկելու ղարաբաղյան հակամարտության կարգավորման հարցը։ Սակայն դա անցավ անարդյունք, ինչից դժգոհ Ալիևը բոյկոտեց սեպտեմբերի սկզբին Դուշանբեում տեղի ունեցած ԱՊՀ երկրների հոբելյանական գագաթնաժողովը։
