Վրացական Novost.ge կայքի փոխանցմամբ՝ նոր ուսումնական տարվանից սկսած՝ Վրաստանում գործելու է նոր ազգային ուսումնական ծրագիր։ Այս մասին այսօր լրագրողներին հայտնել է կրթության նախարար Դմիտրի Շաշկինը։
Վերջինիս խոսքերով՝ նոր ուսումնական ծրագիրը նախատեսված է 1-6-րդ դասարանների համար, իսկ հաջորդ տարվանից սկսած՝ այն ներդրվելու է նաև մնացյալ դասարանների համար.
«Այս ուսումնական տարում 1-7-րդ դասարաններում աշակերտները կսովորեն նոր նշագրված դասագրքերով, որոնք չեն փոխվի առաջիկա 5 տարիներին։ Սոցիալապես անապահով ընտանիքների երեխաները դրանք կստանան անվճար, իսկ մնացածների համար դասագրքի արժեքը չի գերազանցի 10 լարին (6 դոլար)։
Դրա հետ մեկտեղ, այս տարի բոլոր առաջին դասարանցիներն ու նրանց դասվարները նախագահի կողմից կստանան նվերներ. անհատական համակարգիչներ, որոնցում գրանցված է լինելու դպրոցական ծրագիրը։ Այս տարվանից սկսած՝ դպրոցներում կներդրվեն էլեկտրոնային մատյաններ։ Ծնողները կարող են հետևել, թե ինչպես են սովորում իրենց երեխաները։ Դպրոցներում կներդրվի նաև տվյալների էլեկտրոնային բազա, ինչի շնորհիվ ապագայում դպրոցները կղեկավարվեն էլեկտրոնային եղանակով։
Ստեղծվելու են նաև վրացական լեզվի տներ, որոնցում ազգային փոքրամասնությունների ներկայացուցիչները սովորելու են վրացերեն։ Այս տարի պլանավորված է օտար լեզվի ուսուցման ուժեղացում։ Այդ նպատակով վրացական կառավարությունն արտասահմանից հրավիրել է հավելյալ 1500 ուսուցիչ կամավորների»։
Շաշկինը նաև հերքել է շրջանառության մեջ մտած այն լուրը, թե մանկապարտեզները դառնում են պարտադիր՝ դպրոցից առաջ. «Պետությունը չի միջամտում ծնողների ու երեխաների փոխհարաբերություններին, եթե խոսքը չի գնում երեխաների հանդեպ գործադրվող բռնությունների մասին»։
Հիշեցնենք, որ օգոստոսի վերջին էլ հաղորդվում էր, որ նոր ուսումնական տարվանից սկսած՝ Վրաստանի հանրակրթական ուսումնական հաստատություններում ներդրվելու է «Ճանապարհային նշաններ ու անվտանգ երթևեկություն» առարկան, ինչի համար այդ նպատակով ստեղծվել է համապատասխան դասագիրք և պատրաստվել են համապատասխան մասնագետներ։
