Թուրքական Zaman թերթի փոխանցմամբ՝ այսօր առավոտյան Թուրքիայի վարչապետ Էրդողանը պաշտոնական այցով ժամանել է Եգիպտոս, ուր հանդիպումներ է ունենալու պաշտպանության նախարար, գերագույն զինվորական խորհրդի նախագահ Հուսեին Տանտաուի ու վարչապետ Իսամ Շարաֆի հետ և կնքելու է համատեղ զորավարժություններ անցկացնելու մասին երկկողմանի պայմանագիր։
Այցից առաջ Էրդողանը «Ալ Ջազիրա» հեռուստաալիքին տված հարցազրույցի ժամանակ հայտարարել է. «Ես գիտեմ, որ Գազայում մարդիկ սպասում են իմ գալստյանը։ Վաղ թե ուշ՝ ես կայցելեմ Գազա։ Սկզբնական շրջանում մենք Իսրայելի դեմ 5 քայլեր ենք կիրառելու, ինչին ականատես կլինեք առաջիկայում։
Ես չեմ հասկանում այն անձանց, ովքեր ասում են, թե Թուրքիան կպել է Իսրայելին։ Իսրայելի կողմից «Մավի Մարմարա»-ի վրա հարձակվելն ու թուրք քաղաքացիների սպանությունն այդ երկրին պատերազմ հայտարարելու օրինական հիմք էին տալիս ինձ, սակայն ես զսպվածություն դրսևորեցի»։
Հիշեցնենք, որ անցած տարվա մայիսի 31-ին գրանցված «Մավի Մարմարա»-ի միջադեպից հետո Էրդողանը հայտարարեց, թե Թուրքիան «պատրաստ է» Իսրայելի դեմ պատերազմին՝ ընդգծելով, որ Իսրայելը Միջերկրական ծովում զբաղված է «ծովահենությամբ»։
Այն ժամանակ Թուրքիայի արտգործնախարար Ահմեդ Դավութօղլուն տեղի ունեցածը որակեց որպես «թուրքական սեպտեմբերի 11»՝ միջազգային հանրության ուշադրությունը հրավիրելով նրա վրա, որ իրենց քաղաքացիները սպանվել են այլ երկրի կանոնավոր բանակի կողմից։
