Ռեջեփ Թայիփ Էրդողանի խոսքով՝ Թուրքիայի նպատակը Ռուսաստանի հետ լավ հարաբերություններ ունենալն է։ Այս մասին հայտարարել է Թուրքիայի նախագահի պաշտոնակատարը Սիվա նահանգում տեղի ունեցած նախընտրական հանրահավաքում ունեցած ելույթի ժամանակ։
Էրդողանն այս հայտարարությունն արել է՝ ի պատասխան նախագահի ընդդիմադիր թեկնածու Քեմալ Քըլըչդարօղլուի հայտարարության, ով խոստանում է իշխանության գալու դեպքում խիստ պատժամիջոցներ կիրառել Ռուսաստանի դեմ։
«Պարոն Քեմալը դժգոհ է, որ ես լավ հարաբերություններ եմ պահպանում պարոն Պուտինի հետ։ Նա ասում է. «Ես կենթարկվեմ Արեւմուտքին, մենք պատժամիջոցներ կկիրառենք Պուտինի դեմ»։ Պարոն Քեմալ, դուք բացարձակապես քաղաքականությունից չեք հասկանում, գնացեք հանգստացեք»,- ասել է Էրդողանը։
Էրդողանի խոսքով, ինքը նաև աջակցում է ԱՄՆ-ի, արևմտյան այլ երկրների և Չինաստանի հետ դրական հարաբերությունների պահպանմանը։
Նա խոսել է նաեւ Ադրբեջանի հետ համագործակցության զարգացման մասին, ուշադրություն է դարձրել տրանսպորտային ենթակառուցվածքներին։ Միաժամանակ Էրդողանը հայտնել է, որ Թուրքիայի տարածքում արագընթաց երկաթուղի է կառուցվելու, որը կհասնի Բաքու։
«Լոնդոնից գնացքը մեր երկրի տարածքով կկարողանա հասնել Պեկին։ Իհարկե, մենք այդ ամենը կիրականացնենք Ադրբեջանի հետ միասին»,- ասել է Թուրքիայի նախագահը։
Հիշեցնենք, որ Թուրքիայում նախագահական ընտրությունների երկրորդ փուլը տեղի կունենա մայիսի 28-ին։