Դեկտեմբերի 6-ին Մոսկվայում տեղի է ունեցել հաղորդակցությունների ապաշրջափակման աշխատանքային եռակողմ խմբի հերթական նիստը Հայաստանի, ՌԴ և Ադրբեջանի փոխվարչապետների մասնակցությամբ: Դրա ընթացքում, ըստ Հայաստանի փոխվարչապետ Մհեր Գրիգորյանի գրասենյակի տարածած հաղորդագրության, քննարկվել է երկաթուղային հաղորդակցության, երկաթուղու կառուցման հարցը:
Հայաստանի վարչապետ Նիկոլ Փաշինյանը ՀԱՊԿ երևանյան Վեհաժողովի հաջորդ օրը կառավարության նիստում հայտարարեց, որ ՌԴ նախագահի հետ հանդիպմանը դրական ազդակ է ստացել Բաքվից՝ երկաթուղու կառուցման հեռանկարի առնչությամբ: Երևան ժամանելուց առաջ ՌԴ նախագահը հեռախոսազրույց էր ունեցել Իլհամ Ալիևի հետ:
Թե հատկապես ինչ դրական ազդակի մասին էր խոսքը, չի մանրամասնվել, սակայն հատկանշական է, որ դրան զուգահեռ էլ Ադրբեջանը հրապարակային մակարդակում «բացասական ազդակներ» էր հղում Լաչինի միջանցքի առնչությամբ, ի վերջո կատարելով հայտնի «բնապահպանական» սադրանքը և մի քանի ժամ փակելով Լաչինի միջանցքը, որից հետո էլ հայտարարվեց, որ այնտեղ տեղադրվելու է սկանավորման տեխնիկական սարքավորում՝ բեռնափոխադրումը վերահսկելու համար:
Արդյո՞ք Ադրբեջանի այդ գործողությունը այն «դրական ազդակի» համատեքստում էր, որ ստացել էր Երևանը և արդյո՞ք դա նշանակում է, որ քննարկվում է նաև Հայաստանի տարածքով Նախիջևան-Ադրբեջան կապի համանման ռեժիմով վերահսկողության տարբերակ, այդ կերպ փորձելով իրավիճակը բերել այսպես ասած փոխզիջումային լուծման և դուրս բերել բանակցային փակուղու հեռանկարից, որը կարող է դառնալ նոր լարվածության և ռազմական բախման պատճառ: