Երեկ Արժույթի միջազգային հիմնադրամի նախկին նախագահ Դոմինիկ Ստրոս Կանն այցելել է իր նախկին աշխատավայր և հրաժեշտ տվել գործընկերներին` հասցված տհաճությունների համար ներողություն խնդրելով նրանցից: Ստրոս Կանն այստեղ էր եկել առաջին անգամ այն բանից հետո, երբ մայիս ամսին ձերբակալվել էր հյուրանոցի սպասուհու դեմ իրականացված սեռական ոտնձգության մեղադրանքով:
Թեպետ այցի մանրամասների մասին պաշտոնական հայտարարություն չի հաղորդվում, սակայն, համաձայն ամերիկյան լրատվամիջոցների, Ստրոս Կանն ասել է, որ «ինքն այդտեղ է եկել՝ ներողություն խնդրելու բոլոր նրանցից, ում այս պատմությունը վնաս է հասցրել, դա եղել է իր սխալը, և ինքը ափսոսում է բացասական հետևանքների համար, որոնք եղել են այդ հիմնարկությունում»: Ստրոս Կանը նաև հավելել է, որ ինքն ԱՄՆ արդարադատության նկատմամբ որևէ բողոք չունի:
Ստրոս Կանն այստեղ հանդիպել է նաև ԱՄՀ ներկայիս նախագահ Քրիստին Լագարդի հետ, որը փոխարինել էր իրեն այս պաշտոնում: Հիշեցնենք, որ Ստրոս Կանի գործը փակվել էր այն բանից հետո, երբ դատախազությունը լուրջ հակասություններ էր հայտնաբերել տուժածի ցուցմունքներում:
