«Վաղվա Արցախ» կուսակցության նախագահ Տիգրան Պետրոսյանը ֆեյսբուքի իր էջում գրել է․
«2020 թվականի նոյեմբերի 9-ի հայտարարությամբ Լաչինի միջանցքը անցել է ռուս խաղաղապահների հսկողության տակ, որոնք պարտավորվել են ապահովել այս միջանցքի անվտանգությունը։
Այսօր հակառակորդը, անտեսելով եռակողմ պայմանավորվածությունը, սկսել է գնդակոծել Լեռնային Ղարաբաղի տարածքը՝ կիրառելով նաև անօդաչու թռչող սարքեր։ Գնդակոծության հետևանքով մեր կողմից կան զոհեր և վիրավորներ։
Հակառակորդը հրետակոծություններով ու սադրանքներով փորձում է խուճապ մտցնել ու ահաբեկել Արցախի ժողովրդին, ստիպել Արցախի ղեկավարությանը զիջել դիրքերը։ Թշնամու նպատակը Բերձորն է (Լաչին), ուզում են հսկողության տակ առնել քաղաքը, ճանապարհին անցակետեր տեղադրել։ Քանի որ Լաչինի միջանցքը շրջանցող ճանապարհի մի մասը դեռ կառուցված չէ, մենք ստիպված ենք լինելու անցնել նրանց անցակետով, ինչին փորձում է հասնել հակառակորդը։
Այս իրավիճակում մենք տեսնում ենք իշխանության լիակատար կաթվածահար վիճակ, հետևաբար պետք է ինքնակազմակերպվենք և ձեռնարկենք անհրաժեշտ քայլեր։
Մենք տեսնում ենք, որ խաղաղապահները կա՛մ չեն կարողանում, կա՛մ չեն ցանկանում կատարել իրենց պարտավորությունները։ Պետք է խաղաղապահ ուժերի հրամանատարության հետ հանդիպում պահանջել, կոնկրետ հարցեր տալ և դրանց պատասխանները ստանալ։ Արցախի ժողովուրդը պետք է իմանա, թե ինչ է սպասվում, որպեսզի համապատասխան եզրակացություններ անի և ձեռնարկի անհրաժեշտ հետագա քայլերը։
Եթե խաղաղապահ ուժերի ղեկավարությունը հրաժարվի հանդիպումից, ապա հասարակական ճնշում կլինի այս հանդիպումը ստանալու համար։
Մենք ոչ մեկին թույլ չենք տա նսեմացնել հայ ազգի արժանապատվությունը»։
