Իսրայելի նախկին վարչապետ Բենիամին Նեթանյահուն քննադատել է ներկայիս վարչապետի պաշտոնակատար Լապիդին և պաշտպանության նախարար Գանցին՝ Ռուսաստանի հետ հարաբերությունը ճգնաժամի բերելու և լարվածության համար: Նեթանյահուն հայտարարել է, թե տարիներ շարունակ կառուցել է Ռուսաստանի հետ հավասարակշռված քաղաքականություն, որի խախտումն ու ճգնաժամը վտանգ են Իսրայելի համար: Ռուս-իսրայելական հարաբերության լարման նշաններից մեկը հրեական զարգացման գործակալության Մոսկվայի գրասենյակի փակումն է, որ նախաձեռնել է ՌԴ-ն: Ինչով է այն պայմանավորված, մոտեցումներն ու գնահատականները տարբեր են: Հատկանշական է, որ ՌԴ այդ նախաձեռնությունը հուլիսի 19-ին Թեհրան ՌԴ նախագահ Պուտինի սպասվող այցին ընդառաջ էր և պետք չէ բացառել, որ Մոսկվան այդ կերպ փորձում էր ավելի դրական տրամադրվածություն ստանալ Թեհրանից՝ կարևոր պայմանավորվածություններից առաջ: Իսկ այդպիսի պայմանավորվածություններ կարծես թե եղել են: Իսրայելի համար այդ հարցերը անշուշտ շատ զգայուն են: Նեթանյահուն իհարկե դրանք կփորձի օգտագործել նաև երկրում սպասվող առաջիկա խորհրդարանական արտահերթ ընտրությանը հաջողության հասնելու և վարչապետի պաշտոնին վերադառնալու համար:
Անկասկած է սակայն, որ Իսրայել-ՌԴ հարաբերության ճգնաժամը Իսրայելի համար ունի զգայուն նշանակություն, հաշվի առնելով Իրանի հանգամանքը: Ի դեպ, այդ առումով, դեռևս վարչապետի պաշտոնում Նեթանյահուն իրապես աշխատում էր Մոսկվայի հետ, որում իհարկե հիշարժան է գուցե նաև հայկական մի «դրվագ»: 2017 թվականին Իսրայելի վարչապետ Նեթանյահուն Սոչիում Պուտինի հետ հանդիպմանը բարձրացրեց Իրանին զսպելու խնդիրը: Հատկանշական է, որ նույն օրը Սոչիում էին և Պուտինի հետ հանդիպում էին թե Նեթանյահուն, թե նաև Հայաստանի նախագահ Սերժ Սարգսյանը: Դրանից երեք ամիս անց՝ 2017-ի նոյեմբերին եղավ Հայաստանի արտգործնախարար Նալբանդյանի այցը Իսրայել: Այցի ընթացքում նա հանդիպեց նաև Նեթանյահուին, որի գրասենյակը հետո տարածած պաշտոնական հաղորդագրության մեջ նշել էր, թե Նեթանյահուն Հայաստանի արտգործնախարարի հետ քննարկել է Իրանի ռեգիոնալ հավակնությունները զսպելու թեմա: Երևանի հաղորդագրությունը որևէ կերպ չէր հիշատակել այդպիսի քննարկման մասին, այդուհանդերձ Թեհրանը իսրայելական տեղեկատվությանը արձագանքել էր բավականին սուր և զգայուն, Երևանին զգուշացնելով՝ չխաբվել: Ի՞նչ դեր էին «վերապահել» Հայաստանին «հավասարակշռված» հարաբերություն կառուցող Նեթանյահուն և Պուտինը, բավական բարդ է ասել, թեև կասկածից վեր է, որ դրա շրջանակում դիտարկվել է նաև հայ-ադրբեջանական հակամարտությունն ու Ադրբեջան-Իսրայել գործակցությունը, որը Նեթանյահուի պաշտոնավարման տարիներին հասել էր բարձր ինտենսիվության: Ներկայումս նա կարծես թե նոր առաջարկ է անում Ռուսաստանին, հնարավոր է ընդդեմ ԱՄՆ քաղաքականության, որի նախագահը օրերս Իսրայելում էր:
Ի դեպ, հարկ է նկատել, որ ԱՄՆ նոր վարչակազմի պաշտոնամուտից հետո Նեթանյահուն փաստացի զրկվեց վարչապետի պաշտոնից, որը պահպանում էր չնայած մի քանի անգամ տեղի ունեցող արտահերթ ընտրություններին, որոնք թույլ չէին տալիս ձևավորել հաստատուն կառավարություն: Նախագահի պաշտոն ստանձնելուց հետո ԱՄՆ նախագահ Բայդենը այցելեց Իսրայել և դրանից հետո Իսրայելում առժամանակ հաղթահարվեց քաղաքական ճգնաժամն ու ձևավորվեց կոալիցիոն նոր կառավարություն՝ առանց Նաթանյահուի: Ներկայումս սակայն կարծես թե Իսրայելում «իրավիճակ է փոխվում» և հնարավոր է, որ Նեթանյահուն Ռուսաստանին առաջարկում է աջակցել իրեն վարչապետի պաշտոնի վերադառնալու համար: Իսկ ի՞նչ կարող է նա խոստանալ Մոսկվայի աջակցության դիմաց, եթե իհարկե Կրեմլը համաձայնի դրան և դրանից բացի էլ՝ կարողանա հաջողել:
