Հայկական ազգային ավիափոխադրող Fly Arna-ն ոչ միայն պետք է կենտրոնանա թռիչքների, այլ նաև՝ տուրիստական ուղղությունների զարգացման վրա, ինչը հնարավորություն կտա Հայաստանում զարգացնել տուրիզմը, ավելացնել տուրիստական հոսքերը: Նման տեսակետ հայտնեց Հայաստանի պետական հետաքրքրությունների ֆոնդի խորհրդի նախագահ Տիգրան Ավինյանը՝ Fly Arna-ի գործունեության ազդարարման պաշտոնական միջոցառմանը՝ առաջին օդանավի Հայաստան վայրէջք կատարելուց հետո:
Fly Arna-ն Հայաստանի պետական հետաքրքրությունների ֆոնդի (ԱՆԻՖ) եւ «Էյր Արաբիա» խմբի համատեղ ձեռնարկությունն է: Համատեղ ձեռնարկության 51 տոկոսը հայկական կողմինն է, 49 տոկոսը՝ օտարերկրյա ընկերությանը:
«Կառավարության որոշումը՝ մասնակցել այս ծրագրին, կայացվել է այն ակնկալիքով, որ մենք ստեղծում ենք ոչ միայն ընկերություն, որն իր անվան մեջ կրելու է հայկական ազգային անվանում, այլև մեծ ակնկալիքներ ենք ունեցել, որ ավիացիայի ոլորտում մենք կստեղծենք, կբարձրացնենք ստանդարտներն ու չափորոշիչները և հպարտորեն կկարողանանք օրինակելի ավիաընկերություն ստանալ, որն իրապես կարող է օրինակ ծառայել այլ, նույնիսկ միջազգային ընկերությունների համար: Fly Arna-ն, վստահ եմ, որ կարող է և պետք է այս ձգտումն ունենա»,-ասաց Տիգրան Ավինյանը:
Նա նկատեց, որ ՀՀ-ն տարիների ընթացքում ունեցել է չիրացված պոտենցիալ տուրիզմի ոլորտում, որը պայմանավորված է եղել շատ հանգամանքներով, այդ թվում՝ ավտոհաղորդակցությամբ: «Եվ ես վստահ եմ, որ Fly Arna-ն ոչ միայն պետք է կենտրոնանա թռիչքների վրա, այլ նաև՝ տուրիստական ուղղությունների զարգացման վրա, որոնք հնարավորություններ կստեղծեն տուրիզմը դեպի Հայաստան ավելացնելու և զարգացնելու ուղղությամբ»,-ասաց Ավինյանը:
Քաղաքացիական ավիացիայի կոմիտեի նախագահ Տաթևիկ Ռևազյանը, խոսելով ազգային ավիափոխադրողի ծրագրի կյանքի կոչման համար իրագործված աշխատանքի, հաջողության գրավականի մասին, ընդգծեց, որ դրա համար դեռ ջանասիրություն ու աշխատասիրություն է պահանջվում: Ըստ նրա՝ հաջողված ազգային ավիափոխադրող ստեղծելու կարևոր նախապայմանը ուժեղ կառավարումն է, որը ճգնաժամերից խույս չի տա և անգամ ճգնաժամերի ընթացքում շահույթ կհետապնդի և անվտանգության բարձր չափորոշիչներ կունենա: Ռևազյանը խոսեց նաև ռազմավարության մշակման մասին՝ համոզելու «Էյր Արաբիա»-ի գործադիր տնօրենին՝ Հայաստանում ներդրում կատարելու համար, ապա՝ այդ երազանքը իրականություն է դարձել: Նա մեծապես կարևոր մրցակցային և ապահով լինելը:
Հայաստանի պետական հետաքրքրությունների ֆոնդի (ԱՆԻՖ) գործադիր տնօրեն Դավիթ Փափազյանի խոսքով, երբ սկսել էին հայկական ազգային ավիաուղիներ ստեղծելու ծրագիրը, իրենց առաջ դրել էին մի քանի խնդիր՝ ստեղծել իրապես մրցունակ տնտեսական միավոր, որը հիմնված կլինի փորձված, կենսունակ մոդելի վրա: Անդրադառնալով հարցին, թե ինչու են որոշել օտարերկրյա ընկերության հետ համատեղ իրականացնել ծրագիրը՝ նա ասաց. «Այդ թվում, որովհետև «Էյր Արաբիա»-ի մեր գործընկերներն ունեն նշված կենսունակ մոդելի տարիների հաջողված փորձ: Եվ դա Fly Arna-ի մրցունակության գրավականներից մեկն է»:
Նա մեծապես կարևորեց ապահովության և անվտանգության չափանիշները: « Շուկայում գործող այլ ընկերությունների հետ միասին մեր նպատակը պետք է լինի մեկը՝ Հայաստանից դուրս հնարավորինս շատ ուղղություններով ճամփորդելը պետք է դառնա հնարավորինս արագ, անվտանգ և մատչելի»,-ասաց Փափազյանը՝ վստահեցնելով, որ Fly Arna-ի թռիչքների աշխարհագրությունը, հաճախականությունն իր հետ ընդլայնելու է Հայաստանի տնտեսական հնարավորությունները:
Fly Arna-ի գլխավոր գործադիր տնօրեն Էնթոնի Փրայսի խոսքով՝ «Էյր Արաբիա»-ն ամենաապահով, լավ կառավարվող ավիաընկերություններից է աշխարհում: «Մենք հիանալի գործընկեր ունենք և լավ մոդել»,-ասաց Փրայսին՝ շնորհակալություն հայտնելով նաև Հայաստանի պետական հետաքրքրությունների ֆոնդին՝ աջակցության համար:
«Էյր Արաբիա» ընկերությունների խմբի գլխավոր գործադիր տնօրեն Ադել Ալ Ալին ցույց տվեց իր տոմսը՝ ասելով, որ ընկերության առաջին օդանավի առաջին ուղևորն է եղել: «Ձեր երկիրը հիանալի ստրատեգիական դիրք ունի՝ կապելու Եվրոպան Արևելքին»,-նկատեց Ադել Ալ Ալին:
Ըստ նրա՝ Հայաստանում շատ երիտասարդ կրթված մարդիկ կան, և, այսպիսով` Fly Arna-ի գործարկումով հնարավոր կլինի զարգացնել զբոսաշրջության ոլորտը, շատ աշխատատեղեր ստեղծել: Նա նշեց՝ իրենք ուրախ են այդ ամենի մասը լինելով և ամեն հնարավոր բան կանեն:
Fly Arna-ի առաջին օդանավը վայրէջք է կատարել Զվարթնոց միջազգային օդանավակայանում հունիսի 10-ին, իսկ առաջին կանոնավոր չվերթները կմեկնարկեն հուլիսի 3-ից։
