Լիբիայում կատարվող դեպքերն այսօր միջազգային հանրության, մասնավորապես գերտերությունների ուշադրության կենտրոնում են, անգամ ԱՄՆ նախագահն է կոչ արել Լիբիայի նախագահ Քադաֆիին հրաժարվել իշխանությունից հետագա արյունահեղությունից խուսափելու համար: 2008 թ. սկզբին, երբ Հայաստանում ևս հեղափոխական իրավիճակ էր և հետընտրական լարվածություն, ինչը հանգեցրեց նաև իշխանության կողմից ժողովրդի վրա զենք կիրառելուն, միջազգային հանրությունը որևէ կերպ չմիջամտեց և անգամ շատ հաճախ խանգարեց` ճանաչելով նախագահական ընտրությունների արդյունքները:
Ռազմավարական և ազգային հետազոտությունների հայկական կենտրոնի փորձագետ Սարո Սարոյանը «Առաջին լրատվական»-ի հետ զրույցում նշեց, որ նման դիրքորոշման պատճառը քաղաքական շահն է: Սարոյանը նկատեց, որ միջազգային հարաբերություններում ամեն ինչ շարժվում է շահով, և, անկախ նրանից, թե որպես առաջնահերթություն ինչն է դրվում երկրի քաղաքականության հիմքում, շահը, միևնույն է, առկա է ամենուր:
«Նմանատիպ դեպքերը չեն կարող շրջանցել գերտերությունների քաղաքական շահը, այնպես որ, եթե Հայաստանի դեպքերին միջազգային հանրությունը չի միջամտել, ապա իր համար այստեղ շահ չի տեսել, իսկ ահա Լիբիայում տեսնում է: Եթե Հայաստանում էլ այդ պարագայում շահեր ունենային, ապա անպայման կմիջամտեին»,- կարծիք հայտնեց փորձագետը:
