«Նորմանդական ձեւաչափի» մասնակից երկրների (Ռուսաստան, Ուկրաինա, Ֆրանսիա եւ Գերմանիա) ղեկավարների քաղաքական խորհրդականների բանակցությունները Դոնբասի իրադրության կարգավորման շուրջ ավարտվել են ապշեցուցիչ ձախողմամբ, կողմերը հայտնվել են խորը փակուղում: Այդ մասին, կարծիք Է հայտնել Ուկրաինայի Քաղաքականության վերլուծության եւ մենեջմենթի ինստիտուտի տնօրեն Ռուսլան Բորտնիկը:
Քաղաքական խորհրդականների մակարդակով բանակցությունների հերթական փուլը Բեռլինում շարունակվել Է գրեթե ինը ժամ. նախորդ հանդիպումն անցկացվել Է Փարիզում հունվարի 26-ին: Ամփոփելով դրանց արդյունքները՝ Ուկրաինայի նախագահի դիվանատան ղեկավար Անդրեյ Երմակը հայտարարել Է, որ կողմերը չեն կարողացել հանգել համատեղ փաստաթղթի ընդունման, բայց հաստատել են Դոնբասի իրադրության կարգավորման շուրջ Մինսկի համաձայնությունների կատարման անհրաժեշտությունը:
«Բանակցություններն ավարտվել են ապշեցուցիչ ձախողմամբ, որովհետեւ Ուկրաինան շարունակում Է պնդել, որ սկզբում պետք Է կատարվեն անվտանգության շուրջ դրույթները, հումանիտար համաձայնությունները, իսկ հետո անցնել քաղաքական մասին (Մինսկի համաձայնություններին), Ռուսաստանը պահանջում Է քաղաքական երկխոսություն»,-ասել Է Բորտնիկը ՌԻԱ Նովոստիին տված մեկնաբանության մեջ:
Ուկրաինայի շուրջ բանակցությունների այստես կոչված «նորմանդական ձեւաչափը» գոյություն ունի 2014 թվականի հունիսից: Այն ժամանակ Նորմանդիայում դաշնակիցների զորքերի ափհանման 70-ամյակի տոնակատարության ընթացքում Ռուսաստանի, Ուկրաինայի, Գերմանիայի եւ Ֆրանսիայի ղեկավարներն առաջին անգամ քննարկեցին Դոնբասի հակամարտության կարգավորումը: Նախորդ գագաթնաժողովը անցկացվել Է Փարիզում 2019 թվականի դեկտեմբերի 9-ին: Վերջին ժամանակներս կողմերը տարբեր մակարդակներում քննարկում են այս ձեւաչափով փոխգործակցության հեռանկարները, հաղորդել Է ՌԻԱ Նովոստին:
