Հայ-իսրայելական հարաբերությունները «հարթեցման» փուլում են․․ Հայաստանի նոր դեսպանը շուտով կժամանի Իսրայել․ Էսկին

Նոյեմբերի 24-ին ՀՀ ԱԳ նախարար Արարատ Միրզոյանը հեռախոսազրույց է ունեցել Իսրայելի ԱԳ նախարար Յաիր Լապիդի հետ:

Հեռախոսազրույցի ընթացքում Արարատ Միրզոյանը ներկայացրել է Ադրբեջանի կողմից Հայաստանի Հանրապետության տարածքային ամբողջականության և ինքնիշխանության նկատմամբ իրականացված վերջին ագրեսիայի հետևանքով ստեղծված իրավիճակը:

Զրուցակիցները քննարկել են հայ-իսրայելական առկա հարաբերությունները և հեռանկարները:

Անդրադարձ է կատարվել նաև Սուրբ Հողում հայկական պատմամշակութային ու կրոնական ժառանգությանն առնչվող հարցերին։

Իսրայելցի հրապարակախոս, քաղաքագետ Ավիգդոր Էսկինի կարծիքով՝ նկատելի է, որ հայ-իսրայելական հարաբերություններն այժմ հարթվում են․ «Իմ տեղեկություններով՝ . Հայաստանի Հանրապետության մշտական ​​դեսպանը շուտով կժամանի Իսրայել. Նախագահ Արմեն Սարգսյանը Գլազգոյի կլիմայական համաժողովի ընթացքում դրական զրույց է ունեցել Իսրայելի վարչապետ Նաֆթալի Բենեթի հետ։ Դրական տրամադրվածության մասին է վկայում նաև արտգործնախարարների ներկայիս զրույցը»,-«Առաջին լրատվական»-ի հետ զրույցում ասաց նա։

Մեր զրուցակիցը հիշեցնում է, որ կառավարության ղեկավար Նաֆթալի Բենեթը և արտգործնախարար Յաիր Լապիդը նախկինում բազմիցս հանդես են եկել Հայաստանի հետ հարաբերությունների ամրապնդման օգտին․ «Երկուսն էլ հասկանում են Նոյան տապանի երկրի աշխարհաքաղաքական արժեքը և պատրաստ են բաց երկխոսության»։

Ինչ վերաբերում է Երուսաղեմում հայկական ներկայությանը, ապա ըստ Ավիգդոր Էսկինի,  այն 53 տարի շարունակ հանգիստ է  ընթանում Իսրայելի վերահսկողության ներքո․«Առանձին բախումներ են տեղի ունենում Սուրբ Գերեզմանում, որտեղ հակամարտություններ են ծագում Հայ առաքելական եկեղեցու ներկայացուցիչների և Արևելյան եկեղեցու  ներկայացուցիչների միջև, այդ թվում՝ Ռուս ուղղափառ եկեղեցու: Այս միջադեպերը կարող են լուծվել կրոնական առաջնորդների միջև ուղիղ երկխոսության միջոցով: Իսրայելն ընդհանրապես այս գործում կողմ չէ»։

Մեր զրուցակիցը նաև նշեց, որ ինքը հուսով է, որ  որ մոտ ապագայում Հայաստանը ոչ միայն Իսրայելում դեսպանություն կբացի, այլև մշակութային կենտրոն․ «Շատ կարևոր է զբաղվել լուսավորչական աշխատանքով՝ վերհիշելով հին հայկական ավանդույթը և վերածնելով այն։ Արժե հիշեցնել իսրայելցիներին, որ, ի տարբերություն շատ այլ եկեղեցական ուղղությունների, հայ աստվածաբանները չեն քարոզել թշնամություն և մերժում Իսրայելի ավանդույթների նկատմամբ։ Կա ամուր պատմական հիմք մեր երկրների միջև կառուցողական կապերի հաստատման համար»,-եզրափակեց նա։