Պակիստանը թույլատրել է չինացի զինվորական ինժեներներին նկարահանել և նմուշներ վերցնել ամերիկյան այն ուղղաթիռից, որը կործանվել էր Բեն Լադենին ոչնչացնելու գործողության ժամանակ: Այս մասին հայտնում է Financial Times-ը:
Ինչպես գրում է պարբերականը, այս քայլն է՛լ ավելի է խորացնում երկու երկրների միջև լարված հարաբերություններն այն բանից հետո, երբ 2011թ. մայիսի 2-ին ԱՄՆ-ը իրականացրեց Բեն Լադենի ոչնչացման գաղտնի գործողությունը՝ առանց Պակիստանի իշխանություններին այդ մասին հայտնելու:
«ԱՄՆ-ն ունի տեղեկություններ, որ Պակիստանը չինացիներին է տրամադրել Աբբոտաբադում կործանված ամերիկյան ուղղաթիռին մոտենալու հատուկ թույլտվություն»,- ասվում է պարբերականում` հղում անելով Պակիստանի հատուկ ծառայություններին մոտ կանգնած աղբյուրին:
Չինացի ինժեներներին մասնավորապես հետաքրքրում էր ռազմական ուղղաթիռի հատուկ կառուցվածքը և «Ստելս» համակարգը, ինչը թույլ չէր տվել Պակիստանի հակաօդային համակարգին այն հայտնաբերել:
Բեն Լադենի ոչնչացման գործողությունից անմիջապես հետո Պակիստանի իշխանություններն ԱՄՆ-ին հայտնել էին այն մասին, որ չինացիները հետաքրքրվում են նրանց ուղղաթիռով` ավելի կոնկրետ՝ «Ստելս» համակարգով:
Չինաստանը Պակիստանի հետ ունի սերտ հարաբերություններ և զենք է մատակարարում Պակիստանի բանակին:
