Աֆղանստանի «Թալիբան» շարժումը ակնկալում է միջազգային ճանաչում և ցանկանում է բարեկամական հարաբերություններ ունենալ բոլոր երկրների, այդ թվում ՝ ԱՄՆ-ի հետ: Ինչպես տեղեկացնում է «ՌԻԱ Նովոստի»-ին, այս մասին հայտարարել է թալիբների պաշտոնական ներկայացուցիչ Զաբիուլլահ Մուջահիդը:
«Աշխարհը չպետք է վախենա մեզանից, մեզ պետք է ճանաչեն: Մենք ուզում ենք բարեկամական հարաբերություններ ունենալ աշխարհի բոլոր երկրների հետ, այդ թվում` ԱՄՆ-ի»,- ասել է Մուջահիդը:
Աֆղանստանում իրավիճակը հատկապես սրվել է վերջին շաբաթներին, երբ թալիբները սկսեցին հարձակվել խոշոր քաղաքների վրա: Օգոստոսի 15-ին ԶԼՄ-ները հայտնել են, որ ապստամբները վերահսկում են բոլոր սահմանային անցակետերը: Ավելի ուշ, նույն օրը գրոհայինները հայտարարել էին, որ մտել են Քաբուլ և վերահսկողության տակ վերցրել նախագահական պալատը: Աֆղանստանի նախագահ Աշրաֆ Ղանին լքել է երկիրը, նրա խոսքով, որպեսզի կանխի արյունահեղությունը: Օգոստոսի 16-ի գիշերը «Թալիբան» շարժման պաշտոնական ներկայացուցիչ Մուհամեդ Նայիմը հայտարարել է, որ Աֆղանստանում պատերազմն ավարտված է, իսկ երկրում կառավարման ձևը պարզ կդառնա մոտ ժամանակներս:
