Նախօրեին Սահմանադրական դատարանը հակասահմանադրական է ճանաչել «Բարձագույն կրթության և գիտության մասին» օրենքի որոշ դրույթներ: Սա նշանակում է, որ բուհերի բարեփոխումներն անորոշ ժամանակով հետաձգվում են։
Մասնավորապես, ՍԴ-ն հակասահմանադրական է ճանաչել օրենքի 27-րդ հոդվածի 3-րդ և 4-րդ կետերը. «3. Հանրային բուհի կառավարման խորհուրդը ձևավորվում է հետևյալ համամասնությամբ՝ 1) չորսին առաջադրում է բուհի ակադեմիական խորհուրդը, որոնց ներկայացվող պահանջները, առաջադրման և լիազորությունների դադարեցման կարգը սահմանվում են բուհի կանոնադրությամբ, 2) հինգին նշանակում է համապատասխան լիազոր մարմնի ղեկավարը։
- Կառավարման խորհրդի բուհի չորս անդամներին սույն հոդվածի 6-րդ մասում սահմանված ժամկետում չառաջադրելու կամ չորսից պակաս առաջադրելու դեպքում կառավարման խորհրդի բուհի կողմից չառաջադրված անդամների համալրումն իրականացնում է համապատասխան լիազոր մարմնի ղեկավարը»։
Այս դրույթները նախագծի քննարկման ժամանակ խորհրդարանում անգամ իշխանական պատգամավորներն էին համարում խնդրահարույց։ Եվ հիմա այս դրույթների փոփոխություններից հետո նորից պետք է որոշակի գործընթաց անցնի նախագիծը։
Արդեն նախկին պատգամավոր Սոֆյա Հովսեփյանը, որը 7-րդ գումարման ԱԺ-ի Գիտության, կրթության, մշակույթի, սփյուռքի, երիտասարդության հարցերի մշտական հանձնաժողովի անդամ էր, անդրադառնալով ՍԴ այս որոշմանը, «Առաջին լրատվական»-ի հետ զրույցում նշեց, որ ի սկզբանե խնդիրը առաջացել էր հենց այդ կետերի, այսինքն հոգաբարձուների խորհրդի ձևավորման կարգի, ռեկտորի ընտրության վերաբերյալ և բոլոր կրթօջախներն այդ խնդիրը բարձրաձայնել էին:
«Կառավարությունը չէր գնում համաձայնության և որպես փաստարկ նշում էր, որ կառավարությունը որպես պատասխանատու կառույց, պետք է ունենա ձայների մեծամասնություն և ինչու չէ, նաև վերահսկողություն: Որքան էլ ինձ համար այդ սկզբունքը, որ պետք է կառավարությունը նշանակող լինի, ցավալի է, բայց փաստորեն դա տարածել են նաև դպրոցների վրա, ինչն անընդհատ խնդիրներ է առաջացնում»,-ասաց նա:
Նախկին պատգամավորը նշեց, որ ինքը դեմ չի եղել այս օրենքին, որովհետև այնտեղ ներառված էին բազմաթիվ այլ կետեր, որոնք իրապես անհրաժեշտություն են և պետք է դրական փոփոխությունների բերեին բուհերի կյանքում. «Այդ բոլոր հարցերը թողնվում էր ուշադրությունից դուրս և միայն խոսվում էր ռեկտորի ընտրության մասին: Սա էր պատճառը, որ ես դիրքորոշում եմ հայտնել, որ եթե չեք գալիս համաձայնության, հանուն մյուս կետերի օրենքն ընդունենք, և երբ հենց առաջին քայլից տեսնենք, որ դա սխալ է, ապա օրենքի միայն այդ կետը կփոխվի:
Կարծես թե ընդհանուր կոնսենսուս եղավ այդ առումով և օրենքն ընդունվեց: Հենց այդ նույն դրույթի վերաբերյալ ՀՀ նախագահը հանդիպում ունեցավ ռեկտորների հետ, լսեց նրանց կարծիքը, որից հետո դիմեց Սահմանադրական դատարան: Արդյունքում ունենք այն, ինչ ունենք»,-ասաց Սոֆյա Հովսեփյանը:
Նա ընդգծեց, որ այդ կետն իսկապես խնդրահարույց է. «Եթե անգամ ինքը լավ կետ է, սակայն առկա է շահագրգիռ կողմի ոչ դրական կարծիքը, արդեն խնդրահարույց է: Վատն այն է, որ ԿԳՄՍՆ-ն ու կառավարությունը իրենց տեսակետը պնդեցին մինչև վերջ: Օրենքը վերամշակելու կարիք չկա, ընդամենը պետք է օրենքից տվյալ կետը հանվի, որից հետո նույն ընթացակարգով օրենքը պետք է անցնի խորհրդարանով և հասնի նախագահի ստորագրմանը: Հանուն օրենքի մնացած կետերի պետք է արագ այդ հարցը կարգավորել»,-ասաց նա: