«Շարունակվող լարվածությունը հայ-ադրբեջանական սահմանին ընդգծում է, որ միայն համապարփակ կարգավորմամբ, որը կներառի դեռևս չլուծված բոլոր հարցերը, հնարավոր կլինի նորմալացնել հարաբերությունները երկու երկրների միջև և տարածաշրջանի մարդկանց հնարավորություն տալ միմյանց հետ խաղաղ ապրել»։ Սա մեջբերում է ԱՄՆ պետքարտուղարության ներկայացուցիչ Նեդ Փրայսի արձագանքից, կապված Գեղարքունիքի սահմանային դիրքերի հանդեպ ադրբեջանական ոտնձգության հետևանքով բախումների հետ: ԱՄՆ-ը Երևանին ու Բաքվին անում է հրադադարը պահպանելու կոչ, միաժամանակ կոչ անելով նաև անհապաղ վերադառնալ Մինսկի խմբի համանախագահության ձևաչափում առարկայական բանակցությունների:
ԱՄՆ հայտարարության մեջբերվող հատվածը բավականին հետաքրքիր է և բազմիմաստ: Ի՞նչ է ասում Վաշինգտոնը, փաստորեն առերևույթ հավասարության նշան դնելով Բաքվի ու Երևանի միջև, և ինչ որ իմաստով «լեգիտիմացնելով» Բաքվի սադրանքը: Ի վերջո, եթե ասվում է, որ շարունակվող լարվածությունն ընդգծում է բոլոր հարցերի չկարգավորվածությունը և դրա վտանգավոր հետևանքը, ապա ստացվում է, որ այդ «բոլոր հարցերի չկարգավորվածության» հանգամանքի դիտարկումով արդարացվում է Բաքվի սադրանքների քաղաքականությունը: Համենայնդեպս, հատկանշական է, որ չի դատապարտվում ուժի կիրառման ադրբեջանական քաղաքականությունը, այլ նույնիսկ գտնվում են անուղղակի «բացատրող» հանգամանքներ: Առավել ևս, որ հնչում է Մինսկի խմբի համանախագահության ձևաչափի վերադառնալու կոչ այն դեպքում, երբ շատ հստակ կերպով հենց Բաքուն է մերժում դա, իսկ Երևանը պարբերաբար հայտարարում դրա պատրաստակամության մասին: Ուրեմն, ինչու՞ չկա նկատելի կոչ հենց Բաքվին՝ վերադառնալ համանախագահության ձևաչափ և քննարկել «բոլոր հարցերը»: Նշանակո՞ւմ է դա արդյոք, որ ԱՄՆ-ը նաև Երևանում է տեսնում այդ «վերադարձի» խոչընդոտ: Այդ դեպքում, ո՞րն է խոչընդոտը: Թե՞ այդուհանդերձ «առարկայական բանակցություն» ասվածի ներքո քննարկվում կամ դիտարկվում է ոչ միայն Արցախի կարգավիճակի, այլ նաև «միջանցքի» հարց, որ պարբերաբար հայտարարում է Ալիևը: Արդյո՞ք դա է Ադրբեջանի պայմանը՝ Մինսկի խմբի համանախագահություն վերադառնալու, և արդյո՞ք դրա համար է, որ Գեղարքունիքի միջադեպից հետո Հայաստանի վարչապետ Նիկոլ Փաշինյանը վերստին հայտարարեց «միջանցքային» տրամաբանությամբ որևէ քննարկում բացառելու մասին: