Բրիտանական Defender կործանիչը, որը հունիսի վերջին խախտել էր Ֆիոլենտ հրվանդանի մերձակայքում Ռուսաստանի սահմանը, հուլիսի 6-ին արդեն գտնվում էր Ջիբրալթարի նեղուցում: Այդ մասին վկայում են Marine Traffic պորտալի տվյալները:
Վերջին տվյալների համաձայն՝ նավն արդեն հասել է բրիտանական բազա՝ Ատլանտյան օվկիանոսի ելքի մոտ:
Հունիսի 23-ին բրիտանական Defender կործանիչը հատել է Ռուսաստանի սահմանը Ղրիմի Ֆիոլենտ հրվանդանի մոտակայքում: Ռուսական սահմանային նավը, բազմիցս նախազգուշացումներից հետո իրականացրել է նախազգուշական կրակ, իսկ Սու-24 Մ ինքնաթիռը նավի շարժման ընթացքում իրականացրել է «նախազգուշական ռմբակոծություն»:
Բրիտանիայի պաշտպանության նախարարությունն ու կառավարության գրասենյակը հայտնել են, որ նավը «խաղաղ անցում է կատարել Ուկրաինայի տարածքային ջրերով, և ոչ ոք կրակ չի բացել», իսկ Ռուսաստանը «վարժանքներ» է անցկացնում: Այնուամենայնիվ, կործանիչում գտնվող լրագրողը հաստատել է, որ նա դիտավորյալ հատել է սահմանը:
Նախագահ Վլադիմիր Պուտինը Մեծ Բրիտանիայի գործողությունները որակել է սադրանք և անհարգալից վերաբերմունք ղրիմցիների ընտրության նկատմամբ: Միևնույն ժամանակ, նա համոզմունք է հայտնել, որ եթե նույնիսկ ռուս նավաստիները խորտակեին կործանիչը, դա չէր բերի լայնամասշտաբ բախման, քանի որ Արևմուտքը հասկանում է, որ նրանք չեն կարող հաղթող դուրս գալ նման դիմակայությունից:
Ըստ փոխարտգործնախարար Սերգեյ Ռյաբկովի՝ եթե գործընկերները չեն հասկանում, թե որոնք են Ռուսաստանի սահմանները, ապա «մենք կարող ենք ռմբակոծել»:
Նախագահի մամուլի քարտուղար Դմիտրի Պեսկովն էլ նշել է, որ ոչ մի տարբերակ չի կարող բացառվել երկրի սահմանների իրավական պաշտպանության առումով: