Խորհրդարանական վերջին արտահերթ ընտրությունները ևս զերծ չմնացին ընտրակաշառքներ բաժանելու պրակտիկայից, որի վկայությունն են հարուցված տասնյակ քրեական գործերը, որոնք գրեթե բոլորը վերաբերում է ընդդիմադիր ուժերի օգտին արված կեղծիքներին:
Արդեն հնչում են տեսակետներ, որ եթե վերջին ընտրությունների ժամանակ ընտրակեղծարարները չպատժվեն, չազատազրկվեն, այդ թվում Արմեն Չարչյանը, ապա մյուս ընտրություններին ընտրակեղծիքները կդառնան համատարած և քրեաօլիգարխիկ խմբավորումները նորից կհաղթեն:
Այս խնդրի առնչությամբ քաղաքագետ Արմեն Վարդանյանն «Առաջին լրատվական»-ի հետ զրույցում նշեց. «Ամեն դեպքում անպատժելիությունը բերում է նոր հանցագործությունների, եթե մարդը չի պատժվում, իր մոտ գայթակղությունը մեծանում է նորից բաժանել ընտրակաշառք, ընտրակեղծիքների դիմել: Գոնե մեկ անգամ պետք է պատիժ լինի, որ մյուսներին դաս լինի: Դատախազության տարածած հայտարարությունից պարզ է դառնում, որ ընտրակաշառք բաժանող կինը խոստովանել է մեղքը և ազատվել պատասխանատվությունից: Ես չգիտեմ, թե օրենքի տեսանկյունից սա որքանով է ճիշտ, բայց արդարության, բարոյականության տեսանկյունից անընդունելի է և նոր հարցեր է առաջացնում: Ցավոք սրտի, այո, Հայաստանում կան մարդիկ, որոնք դեռևս մատների արանքով են դրան նայում, որոնք մտածում են, որ կարելի է ընտրակաշառք բաժանել, կարելի է մարդկանց կամքի վրա ազդել, գործատուն կարող է իր ենթականերին ստիպել, որ գնան ու քվեարկեն այս կամ այն ուժի օգտին ու անպատիժ մնալ: Սա գալիս է նրանից, որ երկար տարիներ ընտրակեղծարարները, ընտրակաշառք տվողները չեն պատժվել, և սա շատերի մոտ այն զգացումն է առաջացրել, որ կարելի է նման բան անել»:
Նա անդրադարձավ նաև ապօրինի գույքի բռնագանձման օրենքին և Նիկոլ Փաշինյանի հայտարարությանը, թե իշխանությունը պիտի կարողանա արդարության ճանապարհով քայլել, որպեսզի գործի ոչ թե վրեժխնդրության տրամաբանությունը, այլ օրինականության, և արդարության հաստատման տրամաբանությունը: Հարցին, թե պողպատյա հեղափոխության խոստումները որքանով կարող են իրատեսական համարվել ու կյանքի կոչվել, Արմեն Վարդանյանն ասաց. «Կարծես թե որոշ խոստումներ իշխանությունը կիրականացնի: Խոսքը վերաբերում է և ապօրինի գույքի բռնագանձման մասին օրենքին, և վեթինգին են նորից կարծես ուզում անդրադառնալ: Իհարկե համաձայն եմ, որ այդ օրենքը չպետք է կամայական և ընտրողաբար կիրառվի, որպեսզի արդարության զգացում լինի բոլորի մոտ: չլինի, որ այն մարդիկ, որոնք իշխանության հետ լավ չեն, նրանց գույքը բռնագանձեն, իսկ այն մարդիկ, որոնք կարողացել են հեղափոխությունից հետո իշխանության հետ լեզու գտնել, չանցնե այդ օրենքի միջով: Այո, այս օրենքները պետք է կիրառվեն, բայց նաև կարծում եմ՝ օրենքը պետք է շատ զգույշ կիրառել, որպեսզի անարդարության դրսևորումներ չլինեն»:
Քաղաքագետը նկատեց, որ նույնիսկ նախորդ իշխանության ներկայացուցիչների նկատմամբ շատ հարցերում ընտրողաբար են վերաբերվում. «Նույն Նիկոլ Փաշինյանը երկար տարիներ բարձրաձայնում էր Սամվել Ալեքսանյանի մենաշնորհների մասին, բայց մենք տեսանք, որ հեղափոխությունից հետո Սամվել Ալեքսանյանը իշխանությունների հետ լեզու գտավ և շարունակում է ապրել շատ հանգիստ կյանքով և տարիներով ձեռք բերված գույքը խնդիր չի առաջացնում իշխանությունների մոտ: Միայն մեկ դեպքում մի մանկապարտեզ իշխանությունների հորդորով վերադարձրեց քաղաքային իշխանություններին: Դա ժամանակին Սամվել Ալեքսանյանն էր սեփականաշնորհել: Այնպես որ, շատ կարևոր է, որ նոր օրենքը համատարած կիրառվի և որևէ մեկի մոտ կասկած չլինի, որ այն սելեկտիվ է իրականացվում»,-ասաց նա:
