ԱՄՆ Նյու Ջերսի նահանգում մոծակի խայթելուց հետո մի տղամարդ վարակվել է հազվագյուտ հիվանդությունով: Lenta պարբերականի փոխանցմամբ՝ այս մասին հայտնել է Fox News-ը: Հեռուստաալիքի տվյալներով՝ Անգլիայի Սասեքս կոմսությունից 60-ամյա տղամարդու մոտ մայիսին բարձրացել է ջերմությունը, նրա մոտ առաջացել են նյարդաբանական խանգարումներ, որից հետո նա հոսպիտալացվել է:
Բժիշկները պարզել են, որ տղամարդն ունի Ջեյմսթաուն-Կանյոն վիրուս՝ հազվագյուտ հիվանդություն, որը տարածվում է մոծակների կողմից, որոնք էլ իրենց հերթին այն ստանում են եղնիկներից կամ այլ վայրի կենդանիներից:
Ըստ բուժաշխատողների՝ շատ դեպքերում հիվանդությունը ասիմպտոմատիկ է կամ թեթև, բայց ավելի հազվադեպ վիրուսը կարող է ազդել մարդու կենտրոնական նյարդային համակարգի վրա: Եթե հիվանդությունը ծանր է, ապա կարող է պահանջվել հոսպիտալացում, իսկ վարակի որոշ դեպքեր մահացու են:
Համաձայն Հիվանդությունների վերահսկման և կանխարգելման կենտրոնի՝ Ջեյմսթաուն-Կանյոն վիրուսով վարակվելու նախնական ախտանիշներն են ջերմությունը, գլխացավը, հոգնածությունը և հազը, կոկորդի ցավը կամ քթից հոսքը: Այս վիրուսի բուժման համար պատվաստանյութ կամ դեղամիջոց գոյություն չունի: Ըստ Հիվանդությունների վերահսկման և կանխարգելման կենտրոնի՝ վարակի ռիսկը նվազեցնելու լավագույն միջոցը մոծակների խայթոցներից խուսափելն է:
Վիրուսն իր անվանումը ստացել է այն բանից հետո, երբ առաջին անգամ հայտնաբերվել է 1961 թվականին Կոլորադո նահանգում Ջեյմսթաունի կանյոնի մոծակների մոտ:
