Ինչպես հաղորդում են համաշխարհային լրատվամիջոցները, իրավիճակը Ռիո դե Ժանեյրոյում շարունակում է մնալ ծայրահեղ լարված: France-Presse գործակալության փոխանցմամբ, վերջին օրերի բախումների ժամանակ արդեն զոհվել է 30 մարդ, բայց հստակ չէ, թե դրանցից որքանն են ոստիկաններ ու որքանը` խաղաղ բնակիչներ:
Վերջին օրվա ընթացքում ոստիկանները զինվորականների աջակցությամբ կարողացել են վերականգնել վերահսկողությունը բրազիլիական այդ քաղաքի շրջաններից մեկի` Վիլա Կռուզի նկատմամբ: Այստեղ բարիկադավորվել էին մի քանի հարյուր բանդիտային խմբեր, որոնց բրազիլիական ոստիկանությունը դուրս էր մղել այլ շրջաններից: Նրանք այրել են բազմաթիվ մեքենաներ, իսկ երբ ոստիկաններն են մոտեցել, տարբեր տեսակի զենքերից նրանք կրակ են բացել իրավապահների վրա:
Մոտ 500 ոստիկաններին և զինվորականներին հաջողվել է դուրս մղել քրեական տարրերին այդ շրջանից: Հիմա նրանք թաքնվում են Ռիոյի մեկ այլ շրջանում և պատրաստվում են դիմադրության:
Հիշեցնենք նաև, որ Բրազիլիան ստացել է 2016թ. Ֆուտբոլի աշխարհի առաջնությունն անցկացնելու իրավունք, իսկ խաղերի մի մասն էլ անցնելու է հենց Ռիո դե Ժանեյրոյում: Մինչև այս իրավունքը տալը շատերն էին խոսում անվտանգության խնդիրների մասին, սակայն բրազիլիացի իշխանավորները խոստացել են ապահովել առաջնության անվտանգությունը: Թե որքանով կարող են նրանք դա իրականացնել այս պայմաններում, դեռ անհայտ է: