«Կրեմլը պաշտոնապես հայտարարել է, որ Հայաստանում տեղի ունեցողը Հայաստանի ներքին հարցն է և ցանկալի է, որ ներքաղաքական խնդիրները լուծվեն խաղաղ ու սահմանադրական ճանապարհով։ Սա է Ռուսաստանի դիրքորոշումն ու այն անփոփոխ է»,-«Առաջին լրատվական»-ի հետ զրույցում նման տեսակետ հայտնեց ռուսաստանցի քաղաքագետ Ստանիսլավ Տարասովը։
Մեր զրուցակիցն ընդգծեց՝ այդուհանդերձ, Մոսկվայում ուշադրությամբ հետևում են Հայաստանի ներքաղաքական զարգացումներին. «Ուզեք թե չուզեք, քաղաքական սուր ճգնաժամը խանգարում է Հայաստանի զարգացմանը, խոչընդոտում կառավարմանը։ Պարբերաբար պետական շենքեր, նախարարություններ են գրավում, ինչը կառավարման ճգնաժամ է առաջացնում։ Ինչ-որ լուծում պետք է գտնվի, իսկ թե ինչպիսի լուծում՝ քաղաքական ուժերը պետք է որոշեն։ Հարցն այստեղ այն է, թե ինչքանով է վարչապետ Փաշինյանը պատրաստ կոմպրոմիսային լուծման։ Շատ դժվար է այժմ դատողություններ անել»։
Տարասովը նաև նկատեց, որ աշխարհի ամենատարբեր երկրներում նման խոշոր պարտություններից հետո առաջնորդները հրաժարական են տալիս։ Մինչդեռ, ըստ քաղաքագետի, իշխող թիմին հաջողվել է դիսկուրսը տեղափոխել նախկինների դեմ պայքարի դաշտ. «Պարադոքս է։ Նման պարտություններից հետո սովորաբար իշխանությունները հրաժարական են տալիս։ Հիմա Փաշինյանն ասում է, որ պարտության մեղավորը գեներալիտետն էր, և որ նրանց վրա կար նախկին իշխանությունների ազդեցությունը։ 2 միլիոն հայության մեջ չկայի՞ն այլ գեներալներ, որ մինչ այժմ պաշտոնավարում էին նախկին իշխանությունների ենթակա գեներալները։ Մի փոքր տարօրինակ իրավիճակ է։ Հասկանալի է, որ ամբողջ հայրությունն այժմ ողբերգություն է ապրում, ու այս իրավիճակը շատ ծանր է բոլորի համար, բայց լուծումներ են պետք։ Հարցն այն է, որ հայերը ոչ միայն Ղարաբաղն են կորցրել, այլ նկատենք, որ շատ մեծ անկում է ապրել հայկական Սփյուռքի հեղինակությունը, այդ թվում նաև Ռուսաստանում»։
Քաղաքագետը նկատեց՝ արդեն հստակ է, թե ինչպես Փաշինյանը մտավ պատմություն, իսկ թե ինչպես դուրս կգա այդ պատմությունից՝ առայժմ անհայտ է։
Ինչ վերաբերում է Ռուսաստանում ապրող հայերի և հատկապես օլիգարխների տրամադրվածությանը, Ստանիսլավ Տարասովն ընդգծեց. «Նախ և առաջ նկատենք, որ Ռուսաստանում բնակվող հայերը Ռուսաստանի քաղաքացի են։ Այո՛, իրենք ֆինանսական աջակցություն են ցուցաբերում Հայաստանին, և մենք այդ առումով որևէ առարկություն չունենք։ Կան այնպիսիք, որոնք աջակցում են Փաշինյանին, կան նաև այնպիսիք, որոնք դեմ են Փաշինյանին, համարում են, որ նա հասարակությանը տրամադրել է իրար դեմ, և որ նրա պատճառով կորցվել է ոչ միայն Ղարաբաղը, այլ նաև հայկական պետականության կորստի վտանգ կա։ Դա նրանց անձնական կարծիքն է, ու Մոսկվան այդտեղ որևէ միջամտություն չունի»։