Արդարադատության նախարարությունն առաջարկում է կազմավորել ներքին գործերի նախարարություն։
Հայտնի է դարձել, որ, ըստ նախագծի՝ նախարարության մեջ է մտնելու նաև Միգրացիայի և քաղաքացիության ծառայությունը։ Ըստ ձեզ՝ ինչո՞վ է պայմանավորված այս փոփոխությունը․ «Առաջին լրատվական»-ի հարցին Միգրացիոն ծառայության պետ Արմեն Ղազարյանը պատասխանեց․ «Պետք է նշեմ, որ միգրացիայի կառավարման ոլորտում դա, թերևս, վերջին շրջանում արվող ամենակարևոր ինստիտուցիոնալ փոփոխությունն է, որը, հուսանք՝ առաջիկայում տեղի կունենա։ Ո՞րն է խնդիրը։ Միգրացիային առնչվող գործառույթները լայն սփռված են ամբողջ պետական համակարգով մեկ՝ իրականացվում են պետական տարբեր գերատեսչությունների կողմից, ըստ այդմ էլ նվազում է միգրացիայի կառավարման արդյունավետությունը։ Օրինակ՝ միգրացիային առնչվող մի շարք կառավարման գործառույթներ իրականացնում է ոստիկանությունը, ոստիկանության անձնագրային և վիզաների վարչությունը, որոնք իրենց բնույթով քաղաքացիական գործառույթներ են, բայց վերապահված են ոստիկանական մարմնին։
Միաժամանակ, տարածքային կառավարման նախարարության մեջ ընդգրկված Միգրացիոն ծառայությունն իրականացնում է մի շարք սոցիալական բնույթի գործառույթներ, որոնք բնորոշ չեն միգրացիայով զբաղվող կառավարման մարմիններին։ Մենք արդարադատության նախարարության գործընկերների հետ ուսումնասիրել ենք 30-ից ավելի պետությունների փորձ, և տեսել ենք, որ այս ֆունկցիաները հիմնականում իրականացվում են ներքին գործերի նախարարությունների կազմում գործող միգրացիոն ծառայությունների կողմից։ Մենք գտանք, որ այս ճանապարհով հնարավոր կլինի բարձրացնել միգրացիայի կառավարման արդյունավետությունը»։
Մանրամասները՝ տեսանյութում։
