Հայ-իրանական սահմանի փակման շուրջ որևէ քննարկում չկա Իրանում: Այս մասին «Առաջին լրատվական»-ի հետ զրույցում նշեց Թեհրանում լույս տեսնող «Արաքս» շաբաթաթերթի խմբագիր Մովսես Քեշիշյանը՝ անդրադառնալով լուրերին, թե Իրանի շուրջ լարվածության պատճառով կարող է փակվել հայ-իրանական սահմանը:
Նրա խոսքով՝ Իրանը այդ հարցով իհարկե իր մտահոգությունը հայտնել է, որ իր համար շատ կարևոր է Իրան-Հայաստան սահմանը, որ դա փոփոխության ենթակա չէ: «Իրանը պնդում է, որ սահմանները պետք է բաց մնան, և աշխատում են, որ աշխատունակ լինի այդ սահմանը: Պատերազմական օրերին այդ սահմանը բավականին լավ աշխատել է և այսօր էլ աշխատում է: Իհարկե, կորոնավիրուսի հետ կապված մարդկանց տեղաշարժի հարցում եղան սահմանափակումներ, բայց բեռնափոխադրումներն անարգել իրականացվում են։ Այնպես որ, սահմանի հնարավոր փակման հետ կապված քննարկումներ չկան ու չեն կարող լինել: Սահմանի փակման հնարավորություն չկա, սա նուրբ ու կարևոր հարց է, և Իրանը չի կարող նման բան թույլ տալ»,- ասաց Քեշիշյանը:
Հարցին, թե հայ-իրանական հարաբերություններում դրական առումով բեկում կարո՞ղ է լինել, թե՞ ոչ, նա պատասխանեց. «Բեկում ասելը բարդ հարց է, բեկումնային իրավիճակ ունենալու համար պետք է կողմերը հասկանան վիճակը, պետք է հաշվի առնվեն տարածաշրջանում այլ փոփոխությունները, Հայաստանն այսօրվա իրավիճակում ինչ պայմաններ ունի, ճանապարհների վիճակ, արդյոք հնարավորություն կլինի՞ օգտագործել Հայաստանի սահմանները իր ամբողջության մեջ: Հյուսիս-Հարավ ճանապարհի հարցով պետք է փորձեն լուծում տալ: 2020-ը շատ ծանր նստեց Հայաստանի վրա, Հայաստանի հզորության համար պետք է օգտագործվեն ճանապարհները, և հայկական կողմը իրանական շուկա դուրս գա, իրանական ապրանքը Հայաստանով անցնի, և Հայաստանը ավելի աշխույժ ներկայություն ունենա Իրան-ԵԱՏՄ հարաբերություններում»:
Հարցին՝ ի՞նչ նպատակ է հետապնդում Իրանը վերջին օրերին ԱԹՍ-ներ փորձարկելով, Քեշիշյանը նկատեց, որ Իրանը, տարածաշրջանի վերջին զարգացումները, նաև արցախյան պատերազմի փորձը հաշվի առնելով, որոշ քայլեր է անում՝ ցույց տալով իր կարողությունները և տարածաշրջանային մրցակիցներին հասկացնելով, որ հետ չի մնում և պատրաստ է ամեն կերպ պաշտպանել իրեն. «Նկատի առնենք, որ Իրանը ուղղակիորեն փորձարկում է իր կարողությունները՝ առանց դիմացինին ազդարարելու»:
