Հիրավի՝ մենք ապրում ենք հայության համար բախտորոշ ժամանակաշրջանում։ Մեր ժողովրդի և պետության համար այս ճակատագրական ժամանակաշրջանում դիմավորելով նոր՝ 2021 թվականը, ապավինում ենք մեր ազգի կամքին, իմաստնությանը, հասունությանը, համառությանն ու աշխատասիրությանը։ Համոզված ենք, որ 2021 թվականը լինելու է վերածննդի և կայունության տարի, ունենալու ենք ձեռքբերումներ և իրական առաջընթաց։
Այսօր ոգեկոչում ենք արցախյան պատերազմում նահատակված մեր հերոս զինվորների, կամավորականների, աշխարհազորայինների և քաղաքացիական անձանց սրբազան հիշատակը։ Հերոս նահատակներին արժանավայել կերպով հիշելու միակ միջոցը հերոս նահատակների ընտանիքների և ժառանգների համար ավելի լավ պետություն, ավելի լուսավոր ապագա կառուցելն է։
Ջանք չենք խնայելու հայրենիքի շենացման համար․ հզոր տնտեսություն, հզոր բանակ, հզոր հայրենիք․ սա է նահատակված բյուրավոր քաջերի նկատմամբ մեր բաժին պարտքը արժանիորեն հատուցելու ճանապարհը։
Շնորհավորում ենք աշխարհասփյուռ մեր ժողովրդի Ամանորը։ Միասին հետևողականորեն, քայլ առ քայլ պիտի հաղթահարենք մեզ պատուհասած արհավիրքը ու շարժվենք առաջ՝ հանուն մեր հայրենիքի մաս Արցախ աշխարհի, հանուն Հայաստանի Հանրապետության, և աշխարհասփյուռ հայության։
«Հանուն Հանրապետության» կուսակցություն
