Ադրբեջանի արտգործնախարար Ջեյհուն Բայրամովը պաշտոնական այցով Թեհրանում է, որտեղ հանդիպումներ է ունենում Իրանի ղեկավարության հետ: Այցի թեման Թուրքիայի ներկրած զինյալների, վարձկանների հարցն է, որոնք տեղակայված են Իրանի հյուսիսային սահմանի հարևանությամբ, ինչը, ինչպես նշվում է, Իրանի սահմանի անվտանգության տեսանկյունից լուրջ խնդիրներ է առաջացնում: Բայրամովի այցը հիմա պատահական չէ, պայմանավորված է նրանով, որ Բաքուն հիմա որոշակի վստահություն պետք է տա իրանական կողմին, թե չեն խախտվի սահմանները, չեն խախտվի իրանական շահերը։ Այս մասին «Առաջին լրատվական»-ի հետ զրույցում ասաց Թեհրանում լույս տեսնող «Արաքս» շաբաթաթերթի գլխավոր խմբագիր Մովսես Քեշիշյանը:
«Բնական է, որոշակի վստահություն պետք է տան իրանական կողմին, որ չեն խախտվի սահմանները, իրանական շահերը: Վստահաբար այդ հարցերը կլինեն, բայց ամենակարևորն այն է, որ մինչև Թեհրան մեկնելը Բայրամովը կապ է հաստատել Իսրայելի ԱԳ նախարարի հետ, ինչը նշանակում է, որ իսրայելական կողմին նա վստահություն է ներշնչել, որ Բաքուն համենայնդեպս Իսրայել-Ադրբեջան հարաբերություններն ավելի է կարևորում, քան Բաքու-Թեհրան հարաբերությունները»,- ասաց Քեշիշյանը։ Նրա խոսքով՝ ահաբեկիչների ներկայությունը սահմանին, ինչպես նաև Թուրքիայի ներկայությունն ու մասնակցությունը պատերազմին, ոտնահարում էր Թեհրանի շահը։
«Չեմ կարծում, թե շատ պետք է ընդլայնվեն Բայրամովի այցին քննարկվող թեմաները, ավելի շուտ պետք է որոշակի վստահություն ներշնչել, թե համենայնդեպս այս իրավիճակը, որ կա, չի վնասի իրանական կողմին, թեև արդեն գործնականորեն հասել է վնասելուն»,- ասաց նա։
Տեսակետ կա, որ Իրանը լռելյայն կուլ է տվել բոլոր վտանգների կուտակումը իր հյուսիսային սահմանին։ Ըստ Քեշիշյանի՝ պարզ է, որ իրանական կողմը ամբողջովին չզգաց այն վտանգը, որ գալիս է, բայց երբ դեպքերը զարգացան այնպես, որ Իսրայելի և Թուրքիայի ներկայությունը իրանական կողմին վնաս է հասցնում, Իրանը զգաց, որ պետք է զգուշանա: «Ադրբեջանական կողմին վերջնագրեր պետք է տրվեն, որ Իրանի հետ նման կերպ չպետք է վարվել։ Ի վերջո, Իրանն այս հարցի կողքով չի կարող անցնել, և այն, ինչ պատահեց, սա ոչ միայն հայ ժողովրդի, այլ նաև Իրանի պարտությունն էր, քանի որ ուշ կողմնորոշվեց»,- հավելեց Քեշիշյանը։
Ի դեպ, Իրանի ԱԳՆ խոսնակ Սաիդ Խաթիբզադեն անդրադարձել է Իրանի և Ադրբեջանի արտաքին գործերի նախարարներ Մոհամմադ Ջավադ Զարիֆի և Ջեյհուն Բայրամովի հանդիպմանը՝ ընդգծելով, որ հանդիպման ընթացքում արտգործնախարարները մտքեր են փոխանակել Լեռնային Ղարաբաղի հակամարտության, տարածաշրջանային խնդիրների և երկկողմ հարաբերությունների վերաբերյալ։
