«Գերիների վերադարձի խնդիրը պետք է դիտարկել նոյեմբերի 9-ի լույս 10-ի գիշերը ստորագրված հայտարարության տեքստում։ Երբ մենք նայում ենք հայտարարության տեքստը, տեսնում ենք, որ առաջին մի քանի կետերով հստակ ամսաթիվ է նշված տարածքները ազատելու, հայկական զորքերը դուրս բերելու հետ կապված։ Բայց երբ գալիս ու հասնում ենք 8-րդ կետին, տեսնում ենք, որ հստակ ժամկետ նշված չէ»,-«Առաջին լրատվական»-ի հետ զրույցում ասաց փաստաբան Զարուհի Մեջլումյանը։
Նրա խոսքով՝ ապավինել, որ ագրեսորի դիրքերից հանդես եկող ադրբեջանական կողմը պետք է ցուցաբերի տոլերանտություն և վերադարձնի գերիներին, միամտություն է.«Սա քաղաքական պայմանավորվածության խնդիր է և քաղաքական պայմանավորվածությունը այդ փաստաթղթով տեղի չի ունեցել։ Եթե հայտարարությամբ կարելի էր տարածք թողնել ու դուրս գալ, ինչու չէր կարելի կոնկրետ օր սահմանել ռազմագերիների փոխանակման համար։ Միջազգային իրավունքի մաս է, որ կոնֆլիկտի լուծումից հետո նրանք շտապ կարգով արտահանձնման իրավունք ունեն»,-ընդգծեց Մեջլումյանը։