«Սերժ Սարգսյանը դեռ պաշտպանության նախարար եղած ժամանակ արդեն ասում էր, թե մենք անգամ վերցնելու ժամանակ գիտեինք, որ այդ տարածքները հետ պետք է տայինք: Կարծես՝ ընդհանուր տրամադրություն կա տարածքների որոշ մասը վերադարձնելու առումով, իսկ ամենավատն այն է, որ դրա մասին արդեն խոսել է այն ժամանակվա նախարարը և այսօրվա նախագահը՝ առանց դրա դիմաց որևէ բան ստանալու»,- այսօր լրագրողների հետ հանդիպման ժամանակ համեմատելով Ռոբերտ Քոչարյանի և Սերժ Սարգսյանի վարած քաղաքականությունը ԼՂ հարցում՝ կարծիք հայտնեց ՀՅԴ Բյուրոյի Հայ դատի և քաղաքական հարցերի գրասենյակի պատասխանատու Կիրո Մանոյանը:
Նա նկատեց, որ Քոչարյանի և Սարգսյանի քաղաքականությունները ԼՂ հարցով առնվազն ձևով տարբեր են. «Քոչարյանը երբեք չի հայտարարել, թե ինչ-որ տարածք պետք է տան,- թե մտքում այլ բան ուներ՝ չգիտեմ,- բայց ձևի իմաստով տարբեր են»:
Մանոյանի գնահատմամբ՝ Սերժ Սարգսյանի նման հայտարարությունները հիմնականում պայմանավորված է նրանով, որ վերջինս ունի արտաքին լեգիտիմության խնդիր և այդ կերպ կարծես թե արդեն ստացել է այդ լեգիտիմությունը:
Հարցին՝ շարունակո՞ւմ է արդյոք Դաշնակցությունը պահանջել արտգործնախարար Էդվարդ Նալբանդյանի հրաժարականը, Մանոյանը պատասխանեց, որ այդ հարցը մնում է իրենց օրակարգում. «Բայց մենք էլ հասկանում ենք, որ ամեն օր ասելով չէ, որ պետք է նախարարը հրաժարական տա»:
Ինչ վերաբերում է այն հարցին, թե կպահանջի՞ արդյոք Դաշնակցությունը Սերժ Սարգսյանի հրաժարականը, Մանոյանը նկատեց, թե իրենք միշտ ասել են, որ ոչ միայն արտաքին քաղաքականության բնագավառի, այլ նաև երկրի բոլոր խնդիրները կարգավորելու համար համակարգային իշխանափոխություն պետք է լինի, որը միայն մեկ անձով չի պայմանավորված:
