«Սասնա ծռեր» կուսակցությունը նախօրեից կամավորականների խմբեր է ձևավորում և ուղարկում առաջնագիծ: Կուսակցության ներկայացուցիչ Վարուժան Ավետիսյանը «Առաջին լրատվական»-ի հետ զրույցում տեղեկացրեց, որ երեկ երեկոյան արդեն խմբերից մեկը մեկնել է առաջնագիծ:
«Ստորաբաժանում պետք է կազմավորվի ըստ կամավորագրվողների քանակի և օրենքի պարամետրերի, առողջական պարամետրերի»,- ասաց նա:
Հարցին, թե ինչպես է գնահատում վարչապետի հայտարարությունը, որ գոնե այս փուլում Արցախի խնդիրը դիվանագիտական լուծում չունի, և որ պետք է պայքարել մինչև վերջ, Վարուժան Ավետիսյանն ասաց. «Բայց մենք ուրիշ տարբերակ ունե՞նք բացի պայքարելուց: Ես չեմ կարծում, որ որևէ մեկը կարող է հայտարարել, որ դիվանագիտական ասպարեզում բոլոր տարբերակները սպառված են: Խոսքը վերաբերում էր ընդամենը այս պահին դիվանագիտական լուծմանը պատերազմի իրավիճակում: Իսկ ընդհանրապես դիվանագիտությունը չի դադարում երբեք»:
Ինչ վերաբերում է իրենց կողմից իրավիճակի գնահատմանը, «Սասնա ծռերի» ներկայացուցիչն ասաց. «Մերը զինվորական ստորաբաժանում է, և քննարկումներ չենք կազմակերպում: Զինվորական ստորաբաժանումն իր խնդիրն է կատարում»:
Հարցին, թե արդյոք ինքը և՞ս մեկնելու է առաջնագիծ, Վարուժան Ավետիսյանը պատասխանեց. «Այս պահին ես դեռևս կամավորների գործընթացի մեջ եմ: Ըստ որոշման, ի վերջո, բոլորն էլ մեկնելու են: Չվերածենք իրավիճակը լրագրողական սենսացիայի: Պատերազմի ենք պատրաստվում, և ըստ այդմ քայլեր պետք է ձեռնարկվեն: Իհարկե, երկարատև պատերազմական գործընթացի հետ գործ ունենք»:
