Telegram-ի հիմնադիր Պավել Դուրովը Եվրամիությունը համեմատել է «բանանային հանրապետության» հետ՝ անձնական չաթերն ուսումնասիրելու հնարավորություն տվող օրենքի պատճառով։ «Նման հնարքներ, որոնք նախկինում բնորոշ էին «բանանային հանրապետություններին», այժմ ԵՄ-ն օգտագործում է լրտեսության մասին օրենքներ ընդունելու համար»,- գրել է նա X սոցցանցում։
Դուրովն այս կերպ է արձագանքել ԵՄ-ում ընդունված օրենքին, որը թույլատրում է սկանավորել մասնավոր նամակագրությունը՝ երեխաների նկատմամբ սեռական բռնության տեսարաններ որոնելու նպատակով։ Նա կարծիք է հայտնել, որ նման նախաձեռնությունների հետևում կանգնած են «մեծ ու հզոր ուժեր, որոնք կարող են մանիպուլյացիայի ենթարկել Եվրամիությունը»։ Դուրովը վստահեցրել է, որ Telegram-ը չի սկանավորի անձնական հաղորդագրությունները՝ անկախ ԵՄ-ի կիրառած հնարքներից։
Ավելի վաղ Դուրովը հայտարարել էր, որ Եվրոհանձնաժողովի (ԵՀ) կողմից ներկայացված տարիքային ստուգման հավելվածը վերջնարդյունքում վերածվելու է եվրոպացիներին հետևելու գործիքի։ Ըստ Euractiv-ի՝ ԵՀ-ն սեպտեմբերին կարող է հայտարարել երեխաների համար սոցցանցերի օգտագործման համաեվրոպական սահմանափակումների կամ արգելքի մասին։
