Այսօր վաղ առավոտյան Արցախի ուղղությամբ մարտական գործողությունները շարունակվել են և ըստ էության շարունակվել են բոլոր ուղղություններով, այդ թվում՝ այսօր նաև թեժ է եղել կենտրոնական ուղղությունը։ Այս մասին մամուլի ասուլիսում ասաց ՊՆ ներկայացուցիչ Արծրուն Հովհաննիսյանը։
<Հյուսիսում հարձակվողական գործողությունները եղել են հետևյալ բնույթի՝ հարձակվողական մի քանի փորձ են կատարել Ադրբեջանի զինված ուժերը, որոնք հետ են մղվել մեր զորքերի կողմից՝ հակառակորդին պատճառելով զգալի կորուստ։ Կիրառվել է ավիացիա՝ հիմնականում մարտավարական ինքնաթիռներ, որոնք որևէ կերպ հաջողության չեն հասել։
Կենտրոնական ուղղությամբ մի քանի դիվերսիոն խմբեր, որոնց գործողությունները Պաշտպանության բանակը նաև տեսանյութով հրապարակեց, փորձել են ներթափանցել մեր դիրքեր ու առաջանալ։ Մեր հրետանային դիպուկ կրակից հետո դիմել են փախուստի։ Եղել են հիմնականում առանց զրահատեխնիկայի խմբեր:
Հարավային ուղղությամբ մի քանի օջախային մարտերը շարունակվել են, հատկապես ուղղությունը թեքվել է դեպի ավելի հարավ, ավելի մոտ Արաքսի հունին։ Մի քանի օջախային առանձին տեղերում մեր զինված ուժերը հակառակորդի առաջխաղացման բոլոր փորձերը կասեցրել են։ Որևէ խմբավորում որևէ միլիմետր առաջ չի եկել, հետ են մղվել՝ կրելով զգալի կորուստներ:
Օդուժ որպես այդպիսին շատ չի կիրառվել, այսօր առավոտյան մեր ԶՈւ ՀՕՊ ուժերի կողմից խոցվել է հակառակորդի մեկ ինքնաթիռ։ Մարտերը շարունակվում են, դրանք այնքան թեժ չեն նախորդ օրերի թեժ մարտերի համեմատ, բայց պահպանվում են իրենց աստիճանը։ Կիրառվում է հիմնականում հրետանի, քիչ զրահատեխնիկա, մեծ թվով դիվերսիոն ու գրոհող խմբեր, հետևակ և մասամբ օդուժ»,- նշեց ՊՆ ներկայացուցիչը։
